海水領域 SeaFishZone

標題: 請問邊度有得買自家繁殖小丑魚? [打印本頁]

作者: fannylyp 時間: 2019-5-7 14:10:03 標題: 請問邊度有得買自家繁殖小丑魚?

想養小丑, 唔駛精品小丑, 但想買自家繁殖的, 魚街買的野生小丑都好難養得耐咁

想問師兄們知唔知邊度有得賣人工的?

作者: kwan88a 時間: 2019-5-7 15:30:46

呢個網成日都有人放，自己多留意下

作者: Teddy 時間: 2019-5-7 20:30:07

自己留意下2手區

作者: 小魚毛 時間: 2019-5-7 23:59:16

本帖最後由小魚毛於 2019-5-8 00:05 編輯

野生丑係難玩，樓主不防試試人工繁殖o既出品，而家都好多台灣人工繁殖o既小丑，唔一定係咩精品混種，又平又易養，魚街樓上樓下都有，不防留意o下。

作者: fannylyp 時間: 2019-5-8 11:20:20

唔該晒各位CHING!!

作者: 小魚毛 時間: 2019-5-8 13:40:47

小丑係最早被成功以人工繁殖兼商品化o既珊瑚魚，照計舖o既丑分分鐘人工貨多過兼平過野生魚，樓主真係肯定之前o既犠牲品都係野生？定抑或新手Ｑ魚入缸過程有咩做錯咗唔知？

作者: fannylyp 時間: 2019-5-8 15:05:21

小魚毛發表於 2019-5-8 13:40
小丑係最早被成功以人工繁殖兼商品化o既珊瑚魚，照計舖o既丑分分鐘人工貨多過兼平過野生魚，樓主真係肯定之 ...

我係係魚街買的, 成間都係海水魚, 全部員工藍色制服果間, $10一條, 員工話係印尼番貨的, 我估意思係捕番黎既?

作者: 小魚毛 時間: 2019-5-8 18:24:04

本帖最後由小魚毛於 2019-5-8 18:33 編輯

問題應該唔係野生與否上，咁平o既魚，好大機會係以毒藥（毒暈啲魚再撈）或者以魚炮（震暈啲魚呢撈），咁o既方式呢捉魚，特別係菲律賓同印尼就有好多魚民仲用緊呢個舊方法呢捉魚，通常捉到o既魚運到舖頭都得翻半條命，根本好難養到！不過因為易捉所以成本平，魚舖有生意做就話之，所以玩海水魚都係一句：光棍佬教仔，便宜莫貪。

優質o既野生海水魚應該係以人手撈捕，遂絛咁捉，成本當然貴好多，但對魚o既傷害少，生存機會就大好多。以最普通公子小丑卅背心計，野生o既都應該叫緊起碼$30~60，再視乎size、產地、形態而不同。而人工繁殖o既，就算係台灣咁近o既魚場，叫價都一定過百。唔係話一定貴就好，不過買之前搞清楚啲魚邊度呢先畀錢，係買魚o既指定動作。

十蚊o既魚就千祈唔好再買！無謂鼓勵魚民用毒魚呢啲咁唔環保o既方法呢捉魚。魚街樓上樓下起碼有十幾間舖專賣海水魚，最方便就腳、開價最平o既舖，往往就係最鐘意用積極引你買魚，然後等你死魚再不停幫襯o既做生意手法。呢個論壇有商店通告～生物，睇清楚所有魚舖o既地址，樓上樓下都行一轉先，問過晒先至慢慢揀魚畀錢都未遲。另外，大多數有Post返貨通告出呢o既魚舖，最會講埋佢呢批魚係由邊度運翻呢，你可以睇o下你買魚間舖頭有無出過Post，就知佢地連貨源都未必敢交待清楚。

不過又講翻轉頭，樓主似乎Keep魚o既成功率都好低，除咗考慮貨源因素，係咪都要檢視o下自己o既魚缸設備係咪真係捉夠養海水魚？如果好似你買魚咁，只係聽晒一間魚舖o既Sales講完就畀錢跳海，咁我諗你真係要再做多啲功課，唔好再買魚返呢亂試。

作者: fannylyp 時間: 2019-5-9 10:42:19

小魚毛發表於 2019-5-8 18:24
問題應該唔係野生與否上，咁平o既魚，好大機會係以毒藥（毒暈啲魚再撈）或者以魚炮（震暈啲魚呢 ...

多謝各位師兄指點

剛剛開始轉咸水咋，知識好有限，而家會學清楚先再買小丑，害死過兩條小丑，好難受。唔知道原來有哩咁黑心既補魚手法，又唔知道邊度既魚買得過。當初幫襯哩間，睇清楚左條魚無白點,生生猛猛，就買左。兩條魚番黎果晚都正正常常，但第日就突然游得好差，同埋係咁痴住缸邊游，呼吸好急促，跟住睇住佢走左。聽左師兄教路，我以後唔會再幫襯果間咁無良既舖頭😭

我個缸60cmx40cmx35cm (唔知咁樣叫幾多吋缸), 造流, 蛋分, 買左水冷但暫時未開, 個缸而家有一條睡衣, 一條粉紅魔, 目前養左兩個月, 見狀況穩定, 所以想入手一路好想養既小丑.

想請問樓上舖的話有無邊幾間好介紹? 我好少上樓上舖買魚. 求指教

作者: 小魚毛 時間: 2019-5-10 20:18:19

我又唔會話嗰間舖黑心o既，只不過幾十年前無論捉魚賣魚都係咁o既心態，根本無咩環保意識同消費者權益可言，佢地只係用翻幾廿年呢行之有效o既營商手法啫，就等市場自由淘汰啦。

就翻你個缸o既情況，我建議有幾點最好搞清楚先再買魚.......

作者: 小魚毛 時間: 2019-5-10 20:45:10

60cm即係兩尺缸，照計有八十幾升水，己經唔係細缸，你肯定個蛋分夠力處理個缸？

水冷對魚呢講唔係必須品，熱啲至開都無所謂，不過你咁大個缸，應該唔可以用電子水冷，而係行壓縮製冷o既大機。

造流無所謂，有好過無。不過唔見你提過濾系統，你有用珊瑚骨或者生物環之類o既嘢放落濾桶卅過濾倉o既設備嘛？咁大個缸根本無可能只靠蛋分，你個缸o既過濾系統一定要有生物環之類o既濾材養硝化細菌。你開缸兩個月等o既應該就係啲硝化細菌增長至一定數量，咁個水海水缸o既過濾系統至可以話成熟，至可以養得魚。

如果你唔明我講咩，或者唔知生物環係咩，就Google search「硝化系統\N-cycle」(注意！此『踃化』不同彼『消化』，千祈唔好搞錯！）。

作者: 小魚毛 時間: 2019-5-10 21:00:59

最後係生物問題，睡衣係友善o既魚，無問題，問題係條魔魚，佢雖然好粗生易養，好適合開缸，但養定咗就會霸地盤，成為缸中惡爺，同科而較後落缸o既魚（包括小丑魚），如果身形又畀佢細條o既話，就有機會畀佢打死，希望呢個唔係你之前兩條小丑o既死因，不過就算唔係，以後加小丑落缸，都一定要揀size大過條魔魚至得。

作者: kwan88a 時間: 2019-5-12 11:55:57

fannylyp 發表於 2019-5-9 10:42
多謝各位師兄指點
剛剛開始轉咸水咋，知識好有限，而家會學清楚先再買小丑，害死過兩條小丑，好難受。 ...

通常白點唔係一二日就看到，新買魚都要放係第二個缸（Q缸），放14日，當然要日日換水吸最底就最好，如果一野就車落主缸，咀就真係恭喜你，可能成缸都係白點

作者: fannylyp 時間: 2019-5-15 10:24:42

小魚毛發表於 2019-5-10 20:45
60cm即係兩尺缸，照計有八十幾升水，己經唔係細缸，你肯定個蛋分夠力處理個缸？

水冷對魚呢講唔係必須品 ...

我個缸係背濾的, 15W水泵, 過濾倉裏面只係放左2L物環, 無珊瑚骨, 需要加嗎?
我個蛋分係內置式的, 8.5W
水冷係壓縮製冷的, 因為想遲D養小丑既時候可以養到D適合佢地既海葵俾佢地玩
一開始開左缸水, run左以上器材後, 等左2個星期後買左3舊活石, 長開燈, 之後再過兩個星期落睡衣, 迷你巴士, 同埋粉紅魔
加小丑果陣我都見粉紅魔好似好炆熷咁, 所以我地已經即刻將佢撈起隔離, 諗住養定左, 健健康康後先加番粉紅魔入去
我果陣兩條小丑一大一細, 細果條同粉紅魔差唔多大細的, 如果第日再養小丑, 都希望細果條會大少少, 同埋如果加左海葵, 小丑會唔會更安全?

作者: fannylyp 時間: 2019-5-15 10:28:59

kwan88a 發表於 2019-5-12 11:55
通常白點唔係一二日就看到，新買魚都要放係第二個缸（Q缸），放14日，當然要日日換水吸最底就最好，如果一 ...

師兄, 對於Q魚, 我真係無呀

我得一個缸, 只有多一個小缸係用水妖過瀘, 無蛋分, 如果用哩個缸, 我勤力D換水, 吸底, 咁樣夠Q魚嗎?

作者: kwan88a 時間: 2019-5-15 13:55:40

fannylyp 發表於 2019-5-15 10:28
師兄, 對於Q魚, 我真係無呀我得一個缸, 只有多一個小缸係用水妖過瀘, 無蛋分, 如果用哩個缸, 我 ...

我Q都無用化氮，我都係只比氣石，不過我就日日換水

作者: argbatcan 時間: 2019-5-15 14:16:06

fannylyp 發表於 2019-5-15 10:28
師兄, 對於Q魚, 我真係無呀我得一個缸, 只有多一個小缸係用水妖過瀘, 無蛋分, 如果用哩個缸, 我 ...

其實唔洗Q缸, 搵個膠箱加氣石, 睇魚大細, 如果細魚10L甚至5L水足夠了, 每天100%全換水

作者: fannylyp 時間: 2019-5-16 12:19:47

kwan88a 發表於 2019-5-15 13:55
我Q都無用化氮，我都係只比氣石，不過我就日日換水

明白晒!!

作者: fannylyp 時間: 2019-5-16 12:23:06

argbatcan 發表於 2019-5-15 14:16
其實唔洗Q缸, 搵個膠箱加氣石, 睇魚大細, 如果細魚10L甚至5L水足夠了, 每天100%全換水

一次過換100%水無問題? 以前養淡水魚D人話換水唔好換超過50%.同埋想問如果換Q缸水用主缸水會唔會好D? 跟住再係主缸加新水. 定係Q缸每次換新水較好?

作者: argbatcan 時間: 2019-5-16 16:31:55

本帖最後由 argbatcan 於 2019-5-16 16:37 編輯

fannylyp 發表於 2019-5-16 12:23
一次過換100%水無問題? 以前養淡水魚D人話換水唔好換超過50%.同埋想問如果換Q缸水用主缸水會唔會好D? 跟住 ...

每日從主缸换100%水落q箱冇問題，所謂q缸其實係一個暫時養住魚既容器，用乜都得，無需過濾設備，只需提供足夠氧氣! 如果唔想用主缸水既話，用全新水都冇問題，假設你個q箱係10L，準備兩個箱，今日開定聽日既水，每日捉條魚去另一個箱就ok! 呢個方法即係魚友俗稱既ab桶q魚方法! 有d魚友係固定一個缸做q缸，q缸其實本身就係一個過濾系統成熟既獨立魚缸，當然亦冇問題，但本人覺得ab桶好d

作者: fannylyp 時間: 2019-5-17 09:32:36

argbatcan 發表於 2019-5-16 16:31
每日從主缸换100%水落q箱冇問題，所謂q缸其實係一個暫時養住魚既容器，用乜都得，無需過濾設備，只 ...

明白晒!!

作者: 小魚毛 時間: 2019-5-17 18:47:09

fannylyp 發表於 2019-5-15 10:24
我個缸係背濾的, 15W水泵, 過濾倉裏面只係放左2L物環, 無珊瑚骨, 需要加嗎?
我個蛋分係內置式的, 8.5W
...

初步睇你o既器材都ＯＫ，不過建議你最好用魚缸計算機http://fish.0123456789.tw/　計清楚成個缸o既水量等基本資料，個網站可以幫你計埋水泵流量、照明瓦數、飼養密度等資料，對缸主呢講都係必要搞清楚o既數據。你對應翻自己套設備，就知啲器材夠唔夠個缸用。
唔肯定2L生物環夠唔夠你個缸用，不過一個簡單則，如果你放環個倉格仲有空位，就盡量加滿佢，珊瑚骨就唔洗喇，有生物環就夠，不過逾多逾好。

作者: 小魚毛 時間: 2019-5-17 18:55:06

本帖最後由小魚毛於 2019-5-17 18:59 編輯

唔好當葵係小丑o既玩具，佢係會行會走o既珊瑚，對飼養環境o既要求同技術仲高過小丑魚，落缸前要搞清楚你個缸可唔可以養到葵。水質唔可以太差，所以一定要你個缸o既硝化系統成熟咗至可以落葵。水冷你已經有，不過最好o係最熱o既日子開機試試可唔可以keep到水溫28度或以下，唔得o既話就可能要換水冷。造流係另一問題，因為葵會移勳，所以大多數養葵失敗原因係雙葵走咗入造流卅落水位，之後搞成肉醬兼污染缸水......所以所有水泵卅造流卅入水位等位置都要加花籃、海綿、網罩之類o既保護套。

唔同品種o既海葵有唔同需要，我只提幾個可以同小丑共生o既品種：
１）奶咀葵：係最常見同最平價o既海葵，不過亦都最難養，對水質要求唔算好高，但因為最鐘意通缸走，好多時都係死o係造流之內。要有活石o係缸之餘，亦都要學習成日監察住佢、同埋移動佢去安全位置o既技巧，而終於能否成功好大成份都係要靠運氣。
２）公主卅小丑葵：相對奶咀呢講，算係比較定o既品種，但唔常見，價錢亦唔平，而且多數好大隻。除咗活石之外，佢更加須要強光照明，同埋強勁o既造流系統，比較適合o係設備完善o既珊瑚缸飼養，如果你好彩遇到一隻合適入缸o既話，就可能要買套比較高價o既珊瑚缸用燈俱。同埋加強套造流泵。
３）地毯海葵：平價o既品種大概同小丑葵同價，佢算係最「安定」o既海葵，主要停喺缸底，所以有底沙會更適合佢地。光線要有，不過無小丑葵要求咁高，次一等價位o既燈俱都可以，一般造流亦可以，所以算比較易養。但問題係呢種海葵係獵食高手，除咗共生o既魚，缸內所有o既魚甚至其他生物都有機會畀佢食咗，所以如果你養地毯海葵，最好就放棄養小丑以外o既其他魚類。

加得海葵落缸，就已經變成混養缸，唔同純魚缸，所有嘢都要考慮周全，煩就肯定，不過樂趣亦都喺呢度。

作者: fannylyp 時間: 2019-5-20 10:19:02

小魚毛發表於 2019-5-17 18:47
初步睇你o既器材都ＯＫ，不過建議你最好用魚缸計算機http://fish.0123456789.tw/　計清楚成個缸o既水量等 ...

我支燈得24W咋, 個網話要: 所需光量資料：
　弱光適用於：
　觀賞魚用途 42 瓦(watts)
　中光適用於：
　種植陰性水草 63 瓦(watts)
　強光適用於：
　陽性水草/珊瑚 84瓦(watts)(魚缸高度若超過45CM. ，建議使用鹵素燈)
　根據John Fitch的草缸照明公式，最佳照明總功率為 95 W（瓦，Watts = 12.25 x Liters0.46特別適合於中型草缸）

我嚴重唔夠呀, 如果我唔養珊瑚, 支燈係咪都唔夠? 同埋我果支燈係LED, 係咪又唔同計法架?

作者: fannylyp 時間: 2019-5-20 11:07:39

小魚毛發表於 2019-5-17 18:55
唔好當葵係小丑o既玩具，佢係會行會走o既珊瑚，對飼養環境o既要求同技術仲高過小丑魚，落缸前要搞清楚你個缸 ...

水冷試左喇, 哩幾日都熱, 開之前30.X, 開左之後都KEEP到26度左右.
造流已經罩左個保護套粒住成隻:

琴日放生左隻粉紅魔了... 如果最後有心想養奶咀葵的話, 係應該落左奶咀, 養定左先加小丑, 定係相反?

歡迎光臨海水領域 SeaFishZone (http://seafishzone.com/)