海水領域 SeaFishZone

標題: 希望各師兄師姐帶我進坑 [打印本頁]

作者: 我唔知丫 時間: 2019-8-15 00:13:45 標題: 希望各師兄師姐帶我進坑

小弟淡水轉坑咸水
想養下幾條魚仔，同埋珊瑚係（係未叫RT？）

自己諗到既設備如下
60X45X45CM 背濾
水冷海利28A
燈具諗緊用MAXSPECT R5-100
BMQQ 掛氮
有atman cf800濾桶（背濾，有無用呀個濾桶）

以下係諗唔通既
造浪（要幾隻？有無性價比高推介？）
上水泵（要幾多個？要幾多L？型號？係未要推埋水冷？）
豆豆機（係未一定要？因為缸細再擺好似好多野咁）
濾材（係未放珊瑚骨？要用D咩呢？個擺法係點？）
生物石（因為新手關係，爬文話用人工生物石就最好，節省時間同遇少好多問題）
檢測器材（可以推介性格比高既各樣器材嗎？
缸內數值問題,爬文就話PH: 8.1 ~ 8.4，
NO2 NH3 NH4 都要0 ，NO3 是愈低愈好。
想問下係未要達到呢個要求先可以落生物？
清缸底定沙底好？（薄薄沙底又得唔得？好似靚好多？）

最後可以有好多問題都問漏,煩請各師兄師姐指點一下，好讓我及早落坑，感恩。

作者: 肥嘟嘟河馬仔 時間: 2019-8-15 09:02:51

造浪一隻夠，上水泵1500L，豆樽唔係一定要，濾材可以用環，開缸死石乾淨無咁多怪生物。

作者: nickcw 時間: 2019-8-15 10:28:40

耐性 !! 不要心急 .........加魚太快 !

作者: 我唔知丫 時間: 2019-8-15 11:47:22

nickcw 發表於 2019-8-15 10:28
耐性 !! 不要心急 .........加魚太快 !

未加魚嫁，仲未開缸，前前功夫未完全了解

作者: 我唔知丫 時間: 2019-8-15 11:49:15

肥嘟嘟河馬仔發表於 2019-8-15 09:02
造浪一隻夠，上水泵1500L，豆樽唔係一定要，濾材可以用環，開缸死石乾淨無咁多怪生物。

THX CHING濾材生物環要用邊隻環？？唔同淡水個D？

作者: Teddy 時間: 2019-8-15 16:31:15

平平地就用ma環
有錢的可以用ph環

作者: 小魚毛 時間: 2019-8-16 01:07:35

本帖最後由小魚毛於 2019-8-16 01:09 編輯

RT: Reef Tank, FOT: Fish Only Tank，兩類缸o既設定同所用器材係完全唔同，當然有高手係可以喺FOT養到珊瑚，但問題係你要花多幾多心力時間落去啫。

先講缸，60cm係適合入門o既尺寸，要配搭器材亦都有較多選擇，但問題係你個背漏太淺，45cm要再間背漏倉，你留幾多位？我估你應該要起碼預留10~12cm，否則好多嘢都放唔落，咁就無意思，但如果主缸得翻30cm咁窄，你砌石放珊瑚都會好頭㾗？

濾桶設計其實係針對FOT放生物環，RT其實唔多用生物環，因為一般生物環都無辦法將NO3降到去適合珊瑚生長o既水平，而其他RT用o既濾材，都要定期更換或者添加，o下o下要拆開個濾桶呢咁換其實好麻煩，所以濾桶＋生物環咁玩法其實唔適合RT。
如果可以加深個背濾倉，換支強啲o既化氮，再放多一隻上水泵呢推水冷同豆樽，咁就唔洗又水冷又濾桶咁一抽二㨢。

作者: 我唔知丫 時間: 2019-8-16 11:12:26

小魚毛發表於 2019-8-16 01:07
RT: Reef Tank, FOT: Fish Only Tank，兩類缸o既設定同所用器材係完全唔同，當然有高手係可以喺FOT養 ...

唔該CHING先，又爬左D文，豆豆樽可以降低NO3同PO4,又睇到一個通心粉都有同樣效果，因為屋企位置唔大,2呎已經岩岩好。

想問下有無咩濾材岩RT 用呢？？？？

作者: 小魚毛 時間: 2019-8-16 20:01:19

本帖最後由小魚毛於 2019-8-16 20:07 編輯

一般o既豆豆同通心粉都只可以降NO3，減PO4要用ROWA或者PO4x4豆呢類濾材，仲有一種混合豆豆可以同時減晒兩樣。通粉同ROWA都可就咁用網袋落倉，其他幾種豆都要用樽。有位放樽滖豆長遠計一定平過用通粉；同樣道理，用豆＋ROWA亦都慳皮過用混合豆，一切都只係睇你有幾多預算、有幾多地方，同埋將來有幾多時間可以花喺打理個缸上面。

以RT呢講，豆同ROWA 都係入門級濾材，佢地簡單易用兼且價格合理，足夠應付大多數珊瑚o既水質要求。另一路o既濾材就係沸石系統，建議你將來系統升級再考慮。雖然亦都有減NO3同PO4藥水，不過又係長遠用皮費貴問題，我自己只買呢看門口。

缸長兩尺無問題，問題係闊度得18寸就太窄喇，因為你個背濾倉最少都要有4, 5寸深，咁至足夠位放豆樽同化氮，否則再將個化氮同豆樽掛喺背漏倉外面，根本就唔係背濾缸o既設計原意。如果你唔係買現成貨，最好加深個缸2, 3寸，拉闊背漏倉，咁配合器材會多好多選擇。

作者: 小魚毛 時間: 2019-8-16 20:28:36

再討論器材前，先要問問你想養咩珊瑚？

基本上珊瑚缸可以分成LPS（軟珊瑚）同SPS（硬珊瑚）兩大類，兩類珊瑚對水質、水流同光照o既要求都有好大差別，你一定要問清楚自己o既目標同筆直，因為兩類缸對器材功效o既要求亦完全唔同，最終足以令你o既整體開支預算可以有幾倍落差！

作者: 我唔知丫 時間: 2019-8-17 09:52:14

小魚毛發表於 2019-8-16 20:28
再討論器材前，先要問問你想養咩珊瑚？

基本上珊瑚缸可以分成LPS（軟珊瑚）同SPS（硬珊瑚）兩大類，兩類 ...

THX CHING ，了解。
我會養LPS ，被小丑魚海葵吸引下海。最緊要🐅授權。

減NO3,PO4個度，我淘寶見有隻混合黑豆，可以吸收NO3,PO4。想試試。

另外開缸有CHING出讓紫苔生物石500$6舊大大舊，抵唔抵？但基於資金有限，用死石開缸會唔會增加好高難道？

裝備UPDATE 如下：
魚缸：60x45x45CM背濾（濾倉頭中尾-16x20x16CM,寬12cm)咁樣分建議嗎？
燈：ZETLIGHT ZT6500C
上水泵：大陸牌子中科變頻DC40Q-2000
造浪：中科SLIM6000變頻
化氮：紅海星SQ90
水冷：海利28A
濾材：先試下黑豆，白棉
生物石： 13磅

麻煩CHING再俾意見

作者: 小魚毛 時間: 2019-8-18 01:28:38

本帖最後由小魚毛於 2019-8-18 01:30 編輯

我會養LPS ，被小丑魚海葵吸引下海。最緊要🐅授權。
99%人工飼養o既海葵都係死喺造流或者上水泵之內（特別係奶咀），所以如果飼養目標有海葵，就一定要先處理好造流泵問題，最理想就係將造流收埋喺上卅落水倉之內，就可以完全避免到海葵被吸入泵o既問題，不過你個缸得兩尺，就算訂造都好難搞。簡單o既辦法就係一定要「花籃」\ 網袋之類罩好整個泵，避免意外。

減NO3,PO4個度，我淘寶見有隻混合黑豆，可以吸收NO3,PO4。想試試。
如果只係海葵同一啲粗生o既珊瑚，咁相信混合豆都夠用。不過你都要留意水源問題，呢個都係養珊瑚o既另一重點，稍後再傾。

另外開缸有CHING出讓紫苔生物石500$6舊大大舊，抵唔抵？但基於資金有限，用死石開缸會唔會增加好高難道？
唔知啲石大成點，紫苔舊石唔等於百分百安全，而且你個缸唔係大，兼且好窄，大嚿生物石反而可能好阻水，擺位亦麻煩，度清楚尺寸先好，唔好貪平；我建議你買石最大唔好過一尺，有大有細仲好砌景，或者可以買住三幾嚿石開缸，之後至再加石，唔同來源o既石可以增加菌種，對整個缸o既硝化系統都有好處。處理生物石、用生死石開缸問題有排講，畀啲時間我。

作者: 小魚毛 時間: 2019-8-18 15:39:37

水源：
要控制好缸內o既NO3，先決條件不在缸內器材，而係缸外o既水源。
一般家居水喉水都有10ppm以上（我試過個別地區o既水喉水更高到40ppm），咁o既水源其實好難再將缸入邊o既NO3降低。所以如果直接用水喉水開鹽落缸，係無咩可能維持到低NO3，就算你有再強o既過濾系統都一樣，呢個相信係好多人養珊瑚失敗o既原因。

潔淨水源可以係：
1)經純水機過濾o既水喉水，即係經RODI濾芯處理過o既純水，不過純水機係另一筆花費，而且阻地方、使用麻煩，兼且會產生大量癈水，唔會係新手機o既選擇。
2)現成飲用裝o既蒸餾水，價錢太貴，次次換水都要買水亦太麻煩，相信無咩人會咁玩。
3)廁所沖廁用鹹水，雖然係沖廁水，但係其實佢都經過水務署一定o既處理後至送到你屋企，而且最重要係佢水質好，NO3水平近零，基本上SPS都玩到。你係需要搵水喉師傅改裝條鹹水喉，再準備一套簡單o既三級濾樽，咁你就可以慳翻啲買鹽錢，兼隨時有乾淨海水用。

如果你只可以玩水喉水開鹽，咁就要睇睇你屋企水喉水o既NO3幾高，因為佢決定咗你個RT o既NO3水平，0~10ppm就一般o既LPS都養到，10~20ppm就只可以keep到啲粗生o既珊瑚（菇、扣之類），高過20ppm就唔好嘥錢嘥時間喇。

作者: 我唔知丫 時間: 2019-8-18 16:03:13

CHING 我應該只可以用水喉水開鹽，開鹽前會先放氣石曝氯氣。

如果搞到廁所屋企人一定會多聲多氣，所以為左魚缸，最後都會係用水喉水😂

作者: 我唔知丫 時間: 2019-8-18 16:05:46

生物石，是否會建議用活石？我爬過文，活石菌多營養多可加快N-CYCLE 進行，但活石內有好多既生物會影響第日，如蟹，鬼手咁，我怕我第一次下海，清石清得唔乾淨就大獲。

作者: 小魚毛 時間: 2019-8-18 23:33:06

我唔知丫發表於 2019-8-18 16:03
CHING 我應該只可以用水喉水開鹽，開鹽前會先放氣石曝氯氣。

如果搞到廁所屋企人一定會多聲多氣，所以為 ...

打氣除氯只係基本，但對改善養珊瑚o既水質效果呢講就一啲都唔明顯，唔好對佢有咩祈望。

咩都唔好諗住，買咗NO3同PO4 Tester，試咗屋企o既水喉水先，如果爆燈o既話只怕你個缸都幾難玩落去！

作者: 我唔知丫 時間: 2019-8-18 23:36:31

小魚毛發表於 2019-8-18 23:33
打氣除氯只係基本，但對改善養珊瑚o既水質效果呢講就一啲都唔明顯，唔好對佢有咩祈望。

咩都唔好 ...

收到，運緊返黎

作者: 小魚毛 時間: 2019-8-18 23:47:00

我唔知丫發表於 2019-8-18 16:05
生物石，是否會建議用活石？我爬過文，活石菌多營養多可加快N-CYCLE 進行，但活石內有好多既生物會影響第日 ...

有得揀我會先揀活石。

生物石o既用途主要有三個：1.造景，2.擺放珊瑚同埋畀其他生物匿藏，3.培養硝化細菌幫助缸內硝化系統運作。就第1， 2點，人工石完全可以取代，但第3點就只有天然活石至有(落缸之後再養菌又另計)。

矛盾o既係，天然生物石除咗硝化細菌之外，亦都會有好多你未必睇到o既生物寄居，呢啲生物有部份可能會破壞你個珊瑚缸o既生態，例如蟹、螳螂蝦、剛毛蟲，佢地會以幼蟲形態隨生物石入缸，到一定時日長大成熟，進而捕食珊瑚或者其他生物。

所以珊瑚玩家將生物石落缸前都有所謂Q石o既程序，目的就係清走呢啲不受歡迎o既生物，同時保留石中o既有用細菌。同Q魚情況一樣，方法可以有多種，但難保百分百有效，多少要睇o下運。我記得大致有呢幾種：浸低濃度鹽水；浸dip 珊瑚用藥水(eg. Revive)；大水桶內放墊高o既生物石，桶底放死魚或魚糧，以正常鹹水打氣浸石起碼三幾日，生物爬落桶底進食後爬唔翻上墊高咗o既石……詳細做法你最好再爬o下文。

終極玩法係將石內生物同細菌全部殺死(例如熱水煲石)，不過咁做法等同用死石或者人工石，只係保留翻嚿石o既天然形狀同結構，值唔值得就見人見志。

雖然話會有不受歡迎o既生物入缸，不過同樣都會有「意外收穫」，珊瑚、糠蝦、貝、草等一樣有機會增加你個缸o既物種，可以話係「等價交換」啫，所以唔洗太擔心有咩生物意外入缸，總會有方法處理。再者就算你真係可以「徹底清理」好啲石，將來買珊瑚一樣有機會遇到啲不受歡迎生物「偷渡」入缸，學習點樣處理呢啲麻煩友，都係珊瑚飼養者必須掌握o既技巧。

歡迎光臨海水領域 SeaFishZone (http://seafishzone.com/)