海水領域 SeaFishZone

標題: 水冷散熱溫度一問 [打印本頁]

作者: agogomm 時間: 2021-8-10 14:17:59 標題: 水冷散熱溫度一問

想請問如果我100L水用Teco tk500 水冷制冷既時候散熱風口既風溫度會唔會好高嫁？ d風大約幾熱

作者: sammy2098 時間: 2021-8-11 13:21:09

熱風散出可達至4X-5X 左右.

作者: 小魚毛 時間: 2021-8-21 23:57:05

本帖最後由小魚毛於 2021-8-21 23:59 編輯

單單知一個數字，其實無咩意思。

明白樓主申請批文艱難，擔心家人投訴部水冷又嘥電又嘈又熱⋯⋯但好多因素會影響到個缸同部水冷o既熱氣排放感。你100L缸用到TK-500，己經係最理想配搭，你換部阿提卡，或者再大部啲o既水冷，其實效果應該己經無咩差別，因為個缸o既熱量係咁多，你換咩機都唔會令到啲熱消失。所以與其o係揀水冷上猶疑不決，不如更全面咁諗o下屋企環境先。因為以你o既配搭，己經無咩可以改，反而環境因素會更直接影響套缸o既熱量排放。

先睇睇你自己本身情況。除非你長開冷氣，否則你個廳o既熱力係會由較室溫低o既魚缸先吸收，再經水冷排放返入屋。所以首先要問你自己間屋會唔會好熱？呢個牽涉到你屋企坐向、有無西斜、通風好唔好、個廳雜物多唔多、部冷氣機匹數夠唔夠⋯⋯；另外屋企人怕唔怕熱？呢個就涉及人口密度、家人體形/身體狀況、對熱氣o既敏感度……呢啲因素通通都會影響到你部水冷機排放o既熱氣，對屋中人感受的效果。趁未開缸，先考慮個缸o既擺位，通風好唔好？近唔近冷氣？會唔會有陽光照到？洗唔洗加遮光窗簾或者貼反光膠紙？執好個廳啲雜物，唔好有衣物紙箱呢吸熱o既嘢堆o係度。

如果上述情況都存在而間屋又搞無可搞，就只可以搞屋企人……同佢地溝通好，爭取佢地更大程度o既支持\包容，除咗基本批文之外，亦都要畀家人有定心理準備，耗電、噪音、水氣、鹹氣、熱氣、水桶雜物⋯⋯呢啲問題可以盡量減少，但未必可以百份百消除，事前同家人溝通好，好過開缸之後被投訴，連彎都無得轉。

因為熱力係幅射式擴散，你部水冷亦都應該o係放入底櫃裡邊，照計就算張梳化拍住個缸，座嗰個都唔會專登伸隻手入去個水冷散熱口。所以隔住個底櫃，其實你係有空間去處理水冷排放o既熱氣，唔一定要坐梳化嗰個硬食晒。最理想o既做法係拉長兩條來去水喉，將個水冷移出室外，例如花園露台之類；無花園露台o既話，試o下將個水冷移離梳化，都會有幫助。如果真係無位另外安置個水冷，可以試o下喺底櫃放水冷位加一把電腦扇，抽走啲熱氣，再駁條通風軟管，將啲熱氣導引離開梳化，去窗台或者冷氣機底排放，應該都有唔錯效果。

如果咁都唔放心，最後建議就係縮細個缸，減沙熱量排放，照用TK-500。等家人相信滋擾問題唔大，你又一定經驗，再upgrade上100L缸，部水冷又可以用得返。

歡迎光臨海水領域 SeaFishZone (http://seafishzone.com/)