海水領域 SeaFishZone

標題: 為何生物石會咁？ [打印本頁]

作者: 天智 時間: 2021-10-28 20:01:13 標題: 為何生物石會咁？

已經洗過一次，依家第二次出現呢d情況。應該點處理？好似整到魚缸好污糟，會唔會影響海魚健康？

圖片附件: AAEAAC4A-4FBF-44B1-B4F7-221CDA4EFC79.jpeg (2021-10-28 20:00:39, 153.4 KB) / 下載次數 84
http://seafishzone.com/forum.php?mod=attachment&aid=MjAwMzQ0fGIxNGEwZTJkfDE3MzI3ODMyNjR8MHww

作者: 小魚毛 時間: 2021-10-30 10:32:38

叫做生物石，因為佢入邊真係有好多生物居住，睇得到o既微生物、軟體、幼蟲、藻，睇唔到o既細菌......，佢地都係以生物石為家，對海水有淨化作用，可以潔淨珊瑚礁水質、平衡生態。所以珊瑚缸放生物石，原因唔單止係裝飾擺放珊瑚，更重要係佢有過濾潔淨水質功能。

但生物石落缸前如果處理得唔好，例如採集運輸時離水太耐，或者無維持打氣，咁石中o既生物就會死，所以生物石都有平貴差別。

生物死咗，件石唔單止無咗淨化海水能力，石中生物屍體腐化，釋放出磷(po4)等物質，吸引藻苔生長。你石面曾紅色薄膜，就係被石中PO4吸引而生的苔。由於PO4源於石中，你每次只可以洗走石面o既苔&PO4，到你洗完放翻落缸，啲苔又會再生......

作者: 小魚毛 時間: 2021-10-30 10:47:56

本帖最後由小魚毛於 2021-10-30 10:49 編輯

洗石唔好用淡水，咁樣只會殺死更多生物，製造更多PO4，吸引更多苔！一定要用鹹水洗，可以喺換水時用魚缸舊水洗，洗得幾次（或者幾個月），係有機會慢慢咁洗清石中o既PO4，睇o下你有無咁o既耐性。

不過如果你個缸水質太差，或者曾經反過缸、落過藥，咁都有機會導致件石大量生物死亡。所以純魚缸用生物石其實有好多限制，唔容易打理。

所以如果你洗極都仲係翻爆苔，咁不如將啲石變成死石：用淡水浸洗，每日洗沖洗每日換水，你啲石唔算大件，幾個星期都應該沖得乾淨，再浸翻幾日鹹水，咁樣落缸就應該解決到問題。

作者: 小魚毛 時間: 2021-10-30 10:59:35

如果唔係嚴重大爆發，一般對魚唔會有影響。

可以放食苔螺、鮑魚、短刺海膽、食苔巴士（魚），佢地都會幫手食呢啲苔，不過只係輔助性質，問題嚴重或者持續不斷，人手解決仍然免不了。

不過記住，落得魚以外o既生物落缸，就唔好隨便落藥醫魚。盡量避免殺生，做個負責任o既飼者。

作者: 天智 時間: 2021-10-30 22:27:49

好多謝你的耐心解答🙏

作者: 小魚毛 時間: 2021-10-31 10:17:11

不過講返轉頭，你嗰兩嚿石似係啱啱死咗o既珊瑚骨，雖然話生物石都係嚟自死珊瑚，但經過長時間「石化」，嚿珊瑚骨除咗外形更似石頭之外，更重要係多好多生物寄居，藻、貝類、軟體、甚至珊瑚幼體，充滿生氣，唔會光秃秃咁咩都無。

所以從生物寄居量呢睇，你呢兩嚿石唔似有咩生物存在，更加似係死咗無耐o既珊瑚屍體（ie.珊瑚骨），呢個更加似係佢釋放PO4，引至爆苔o既原因。

我會介定佢係死石，仲要係未處理好嗰隻。如果係舖頭將佢地當生物石咁賣畀你，咁就唔好再幫襯佢。

歡迎光臨海水領域 SeaFishZone (http://seafishzone.com/)