海水領域 SeaFishZone

標題: 新手設缸買設備推薦舖頭 [打印本頁]

---

作者: Siusil    時間: 2022-8-17 09:14:13     標題: 新手設缸買設備推薦舖頭

養左幾年淡水魚，準備轉養LPS 加幾條魚仔
想去買設備，如果魚街請問大家有冇推薦舖頭，有耐性答問題而格價係適中 感謝賜教！

1）3尺側濾缸
2）蛋分（我見有外掛式又有圓桶形，見過圓桶可以擺濾格入面好似慳位？）
3）活石
4）造浪（必須嗎？）
5）燈 （我有盞尺半 千尋草燈，應該唔岩用嗎？）

感謝大家回覆

---

作者: 肥嘟嘟河馬仔    時間: 2022-8-17 09:45:06

有耐性答你咪收貴D囉
蛋分睇你位置呎吋買
石就你鍾意啦，活石死石人造石
造浪一定要
千尋養草就得

---

作者: 超新手    時間: 2022-8-17 10:51:46

肥嘟嘟河馬仔 發表於 2022-8-17 09:45
有耐性答你咪收貴D囉
蛋分睇你位置呎吋買
石就你鍾意啦，活石死石人造石

好似答得幾好

---

作者: aquazone    時間: 2022-8-17 11:24:24

玩咸念下好, 有要求就要錢及時間, 要爬文, 器材一步到位, 吾系就養器材, 左換右換得個吉, 光,水流,水質決一不可, 水流十分之重要, 你話三尺缸, 燈要二箋, 水流二至三個, 當然你用一箋燈一個水流都得, 你可上去魚友, 天地等新手店去看看

---

作者: Siusil    時間: 2022-8-17 15:45:58

肥嘟嘟河馬仔 發表於 2022-8-17 09:45
有耐性答你咪收貴D囉
蛋分睇你位置呎吋買
石就你鍾意啦，活石死石人造石

我都明，所以都唔係追求平，唔好食左我隻車就得

---

作者: Siusil    時間: 2022-8-17 15:47:59

aquazone 發表於 2022-8-17 11:24
玩咸念下好, 有要求就要錢及時間, 要爬文, 器材一步到位, 吾系就養器材, 左換右換得個吉, 光,水流,水質決一 ...

睇左好多資料，最後以家睇埋設備，如果ok就開始!! 多謝你答我呀，星期日出去睇下 :)

---

作者: 小魚毛    時間: 2022-8-17 18:22:54

海水同淡水係兩個完全唔同o既世界，自然生景如是，人工環境就更加。所以你想由淡轉鹹，舊草缸的器材&經驗可用o既唔多，可靠o既商舖都唔會鹹淡兼賣，所以你預咗一切一切都要重新開始。

淡水可能你求其行入一間舖，畀錢買齊嘢就可以開缸；但海缸唔同，未了解鹹水缸運作原理之前，切勿去舖頭畀錢買嘢；魚街地舖十之八九都係生意為上，你唔做定功課就咁遊入去，只會一肚氣兼一頸血咁上返岸放棄。

唔係想標籤魚街地舖，但鹹水缸複雜又奢侈，混養缸更加唔洗講，玩o既人唔多，又鹹又淡o既舖頭根本兼顧唔到海缸又精又專o既要求，靠自己做資料搜集肯定更穩陣過信一般地舖sales。所以首先唔好諗住揀一間舖頭行入去可以就咁畀錢開缸。先設定以只賣鹹嘢o既舖頭為目標，要留意間舖係賣器材為主定係賣生物為主，愈偏向一方面，代表舖頭對相關o既認知愈多。器材設備愈多，幫到你開缸o既機會都愈大。

魚街地舖只賣鹹嘢o既舖頭其實一隻手數得晒，樓上舖會有更多選擇，而且分工更精細，器材、魚、軟珊瑚、硬珊瑚，不同的專買店都有，唔行一定係自己損失。詳細地址可以睇翻呢個網站o既商店通告，當中有「魚舖地址」張貼。

唔建議你一次就去買齊嘢，更加唔好信有咩套餐咩即食玩法，行多幾次，睇多幾間，返呢再上網做做功課，定好器材名單，計好晒開支預算至扑鎚，一定好過你一嘢就搬晒所有嘢返屋企。

---

作者: 小魚毛    時間: 2022-8-17 18:27:50

三尺缸水量一啲都唔少，器材級數唔可以太入門，要玩LPS就更加要有水冷，就咁睇你筆直都要過萬。

請小心計好預算。

---

作者: 肥嘟嘟河馬仔    時間: 2022-8-17 19:22:23

Siusil 發表於 2022-8-17 15:45
我都明，所以都唔係追求平，唔好食左我隻車就得

一定會連骨食

---

作者: Siusil    時間: 2022-8-17 20:50:28

小魚毛 發表於 2022-8-17 18:22
海水同淡水係兩個完全唔同o既世界，自然生景如是，人工環境就更加。所以你想由淡轉鹹，舊草缸的器材&經驗可 ...

多謝您咁詳細回覆，以家我進度係做左功課，知道要胖咩設備，但上網睇始終係唔同， 以家下一步係諗住出去睇睇實物，寫好哂價錢+尺寸，先至訂櫃訂缸，到時先再買設備養水 etc 所以先想話搵間有耐性既舖因為唔會即刻課金出黎∼
我目標都係樓上舖，之前淡水時行地舖都知地舖租金貴，做生意模式唔一樣，我諗樓上舖會比較岩我以家要搵既野，但係岩岩開始睇海水設備所以好唔熟悉邊口碑好。多謝您意見 我會睇下個表再出去;)

---

作者: 小魚毛    時間: 2022-8-18 14:33:43



跳海首要條件唔係要好疊水，而且係有耐性。樓主肯放慢腳步慢慢做功課，就係成功o既開始，預祝你開缸成功。

提多你兩樣嘢：
1）有啲本地魚舖設有網店，上面會有齊所有貨品o既資訊＆價格，唔係鼓勵你去幫襯，佢未必係最平最好服務，但喺你度尺計筆直嗰o下就好有用，值得上去呢啲網站做資料搜集。
2）每種器材使用方法都唔同，唔好只係用廠方個「最大處理水量」去計，好多時要有效果，就要將呢個數值成大幾倍。所以唔可以只計外形尺寸，自已個缸o既總水量同器材配合到，咁至最重要。所以你一定要決定咗個缸o既尺寸，至可以選擇設備。

好多時舖頭Sales就係為咗做成生意，個客話唔夠筆直，就幫佢downgrade件器材，咁樣將貨就價，結果係買咗件效力唔夠o既器材返去，得物無所用之餘，更嘥錢嘥時間。試過有老闆因為無啱o既貨，推介我唔幫襯佢而轉去第二間買，或因應我預算建議我買二手貨。所以自已做好資料搜集、計準預算，同搵可靠、有經驗o既舖頭同樣重要。當然，會倒自已米o既老闆，一定要喺「服務費」度有所提升，至可以維到皮，值唔值得畀隻車佢食，只有你自已知。

---

作者: Siusil    時間: 2022-8-18 22:54:01

小魚毛 發表於 2022-8-18 14:33
跳海首要條件唔係要好疊水，而且係有耐性。樓主肯放慢腳步慢慢做功課，就係成功o既開始，預祝你開缸成功。
...

多謝您！ 養過水草好深深感受到真係急唔黎，又哂錢又哂心機 ;( 更加唔想生命枉死以前岩岩開始養魚唔識做功課又心急，聽啲staff講買濾水，結果搞到洗衣機咁轉到啲魚都暈，又係哂錢⋯⋯
等我睇埋哂設備再黎請教下啲料配得岩唔岩
再次多謝您 :)

---

作者: Fishwall    時間: 2022-8-20 00:53:13



你首先要知道自己鐘意養海水魚定珊瑚先，因為兩者設備耍求不同。買錯盞嘥錢。買野新手分開兩三間買，多D同不同舖吹水，你先有機學到野同揾到間夾D跃。前提係你自己最好上網打底有D養海水魚基本常識，唔係你去三間，三間都揾你笨啦反正佢哋覺得你又唔知。有什麼問題上來問啊可以。

---

作者: Fishwall    時間: 2022-8-20 01:03:34

養魚要花時間精神多D，養珊瑚就耍用多D錢買設備，不過養定左珊瑚，似種花種草既感覺多過你養寵物或養魚feel.
''L
,

---

作者: joewong188    時間: 2023-5-4 03:26:16



唔知Siusil ，上咗岸幾耐，佢都係適宜談淡水野！而且條友已經消失咗9個月，可能仲係🉐️得個問字，浪費咗D高手時間！

---

作者: 小魚毛    時間: 2023-5-14 23:28:19

joewong188 發表於 2023-5-4 03:26
唔知Siusil ，上咗岸幾耐，佢都係適宜談淡水野！而且條友已經消失咗9個月，可能仲係🉐& ...

上返岸未賞唔係好事。

鹹濕嘢個樣係好給吸引，但服侍佢就好頭痕；香港人講效率愛速食，同鹹水缸根本就時辰八字唔挾！因了解而分手，總好過痛苦糾纏落去。

樓主喺度留過言，大家交流過，都算係曾經擁有，彼此都有得著。

如果師兄係關心樓主近況，不防又畀啲意見出呢，或者可以引到樓主蒲頭。只要唔係食花生、亂吹無貢獻，就唔會浪費大家時間。

---

歡迎光臨 海水領域 SeaFishZone (http://seafishzone.com/)

Powered by Discuz! X2