海水領域 SeaFishZone

標題: 請問是白點? [打印本頁]

作者: tomasuairyo 時間: 2023-6-22 22:18:53 標題: 請問是白點?

本帖最後由 tomasuairyo 於 2023-6-22 22:21 編輯

複製代碼

https://youtu.be/gmv6qSg7OS8

話說幾個星期前買左條藍吊
用AB桶隔離10日左右,見無咩事就落缸
落缸果時都放左入個隔離盒幾日先放佢出去
期間都無咩野,仲主動開口食糧
琴日換水時唔小心揚起左缸底D污糟野
今日就見條魚出白點(係魚鰭位置都有)

想問係咪我個缸本身有白點
定係
換水改變水質搞到佢出白點?

缸內生物有生物石
青魔,巴士,閃電魔都無出白點健康
醫生蝦同薄荷蝦
條藍吊最後加的...

而家最好係咪撈起D魚落藥?

圖片附件: [白點] S__59023365.jpg (2023-6-22 22:15:02, 202.06 KB) / 下載次數 280
http://seafishzone.com/forum.php?mod=attachment&aid=MjE5NDAwfDdkOWIzZTQ0fDE3NjIxNTg4Mzd8MHww

圖片附件: [白點] S__59023366.jpg (2023-6-22 22:15:02, 218.75 KB) / 下載次數 262
http://seafishzone.com/forum.php?mod=attachment&aid=MjE5Mzk5fDdhYTk5N2I1fDE3NjIxNTg4Mzd8MHww

作者: Kekw3310 時間: 2023-6-22 22:50:32

本帖最後由 Kekw3310 於 2023-6-22 22:51 編輯

個缸本身有白點
落藥要抽起哂生物石同蝦, 銅藥會殺死活石裡面微生物
就算將生物石曬乾變死石, 都要換好多次水先可以落返蝦

作者: Tricity731 時間: 2023-6-23 08:56:23

揚起左缸底D污糟野

作者: tomasuairyo 時間: 2023-6-23 17:59:19

今日見青魔都出白點。清哂缸落左藥。
話說今朝測一測NH3 NH4有微量。NO2就0 係咪正常？

作者: Kekw3310 時間: 2023-6-23 21:04:40

NH3/4 NO2應歸0
至少NH3/4一定要

作者: tomasuairyo 時間: 2023-6-28 09:55:19

經過幾日後白點已經唔覺眼。
但係NH3NH4歸唔到0。
其間試過落菌。又停餵左兩日。
NH3NH4點都有0.15左右。
奇怪NH3NH4唔是應該會轉化成NO2???
但點解我測NO2又無。NH3NH4又會有？
有咩可以改善到個問題。thankyou

作者: Tricity731 時間: 2023-6-28 12:25:13

本帖最後由 Tricity731 於 2023-6-28 12:32 編輯

"................NH4歸唔到0,其間試過落菌................."

氨及銨( NH3/4 )→ 亞硝酸菌→ 亞硝酸鹽( NO2)→ 硝酸菌→ 硝酸鹽( NO3-) → 厭氧性細菌→ 氮氣( N2 )

是否代表菌類及量不足?

作者: tomasuairyo 時間: 2023-6-28 18:02:37

Tricity731 發表於 2023-6-28 12:25
"................NH4歸唔到0,其間試過落菌................."

唯有嘗試再加少少濾材同菌劑。

作者: Kekw3310 時間: 2023-6-28 21:58:03

本帖最後由 Kekw3310 於 2023-6-28 21:58 編輯

話說今朝測一測NH3 NH4有微量。NO2就0 係咪正常？
＞＞唔係正常, 理應由NH3/4轉成NO2最終轉成NO3

奇怪NH3NH4唔是應該會轉化成NO2??? 但點解我測NO2又無。NH3NH4又會有？
＞＞系統未成熟太快落生物
＞＞你用咩濾材、硝化細菌，有無圖片？或者影個缸出黎睇下比多少少資料等大家易少少幫到你
有需要PＭ留言成日食字

作者: tomasuairyo 時間: 2023-6-28 22:14:35

60*30*36 兩呎缸開缸三個月左右
雙濾桶(前置EHEIM 2213 物理濾,後置EHEIM 2217 生化濾)
PH環M size 約2.5L左右,仲有約4磅美國石
背濾蛋分AE NANO 70
缸入面有活石約10磅細魚1*青魔 1*多莉 1*珍珠巴士
一隻清潔蝦與薄荷蝦

作者: Kekw3310 時間: 2023-6-28 23:04:37

60*30*36 兩呎缸開缸三個月左右
>>正常操作下應該唔會再有NH3/4, 有機會會測到約0.2 NO2, 但係你落咩硝化細菌? 最好提供牌子
雖然好多硝化細菌都起到作用, 會唔會有機會買咗淡水用?

雙濾桶(前置EHEIM 2213 物理濾,後置EHEIM 2217 生化濾)
>>呢度係指白棉同生化棉? 桶仲有無擺其他野, 我個人唔會選擇成桶放哂生化棉好易污糟, 其實可以要個桶黎放多少少濾材

PH環M size 約2.5L左右,仲有約4磅美國石/缸入面有活石約10磅
>>以現時黎講濾材方面唔可以話唔夠, 始終睇返你生物量比較少, 唔知你最終想加到幾多生物, 兩呎缸黎講係唔足夠

同埋日常維護係點樣? 例如換水等等

作者: tomasuairyo 時間: 2023-6-28 23:35:19

Kekw3310 發表於 2023-6-28 23:04
60*30*36 兩呎缸開缸三個月左右
>>正常操作下應該唔會再有NH3/4, 有機會會測到約0.2 NO2, 但係你落咩硝化 ...

>>雖然好多硝化細菌都起到作用, 會唔會有機會買咗淡水用?
>>>開缸期bio culture 2000,前幾日買左BIO-DIGEST試下,今日買多左支TM NITRIBIOTIC

>>呢度係指白棉同生化棉? 桶仲有無擺其他野, 我個人唔會選擇成桶放哂生化棉好易污糟, 其實可以要個桶黎放多少少濾材
>>>前置EHEIM 2213 入面有羊毛棉>生化棉>平鋪左一袋環,兩個桶濾材加埋就2.5L左右,約4磅美國石

>>以現時黎講濾材方面唔可以話唔夠, 始終睇返你生物量比較少, 唔知你最終想加到幾多生物, 兩呎缸黎講係唔足夠
>>>其實打算養少少珊瑚草皮/星花類,幾條魚仔(5~6唔知得唔得?),蝦就咁多

>同埋日常維護係點樣? 例如換水等等
一個星期換10%水多d左右, 個半月洗桶咁.
上星期多莉開始出白點,之後隔離落藥(岩岩都回歸大海)
出左白點後d水就開始降唔到NH3/NH4

作者: 小魚毛 時間: 2023-7-1 13:28:09

樓主似乎唔清楚FOT缸同RT混養缸o既設定同操作，用FOT o既玩法呢混養，我未見過有成功例子！白點只係其中一項問題。

如果樓主唔打算ugrade目前o既器材，建議就咁養魚就算，莫講話養珊瑚，其他蝦蟹生物都免問。

作者: 小魚毛 時間: 2023-7-1 13:29:45

本帖最後由小魚毛於 2023-7-1 13:30 編輯

先講水質問題：
NH3 NH4有微量。NO2就0 係咪正常？

正常，NH3 NH4唔一定要歸零，微量水平絕對可以接受。反而NO 2就一定要零，稍稍偏高都有危險。要知道硝化系統係生化運作，好多條件因素影響生物轉化效率，所以啲數值無可能機械式遞進。因為硝酸菌o既運作效率比亞硝酸菌快得多，NO2未有時間積聚就轉化成NO3，正常情況下缸內都唔會測到NO2，否則就係NH3/4大量出現，或者硝酸菌大量消失。所以除咗開缸養水嗰幾星期要留意之外，NO2根本係唔需要測試o既數值。睇住NO3 & PO4呢兩樣嘢更加緊要，佢地o既上落變化更大，更足以反映水質情況。樓主如果係玩珊瑚缸，控制NO3 & PO4係最最最基本課題，呢兩樣搞得好，NH3/4根本唔會有問題，NO2就更加唔洗講。

作者: 小魚毛 時間: 2023-7-1 13:35:59

白點問題：
FOT係同白點劃清界線，絕對「一點不留」。RT情況唔同，同白點採取「容忍共螎」政策，但咁唔等於躺平佛系，而係採取選擇性o既對策，要避免對缸內其他生物造成衝擊為前題。

要知白點唔係珊瑚魚o既絕症，更加唔會喺自然生境下大量爆發。佢成為FOT o既殺手，係因為人工o既封閉、密集式飼養環境，就好似禽流感未必會導致一個地區o既雀鳥滅絕，但就可以輕易橫掃殺清區內所有農場o既禽鳥。RT同FOT唔同，魚o既飼養密度低，水質亦都比FOT高得多，所以只要魚隻本身夠強健，白點出現都唔一定會有傷亡。事實上，RT缸比較多沙石，有利於白點藏身，平時唔會對生物構成影響，但當有新魚落缸，或者水質出現問題，影響到魚隻健康，都會有機會引發潛藏o既白點。

FOT白點藥主要係銅，但銅對珊瑚&其他生物係劇毒，所以完全唔可以用落RT。RT白點藥都係「走銅」，但功效就非常參差，效果難有百份百保證。但基於RTo既生境，配合用藥，係有可能避免白點擴散，甚至醫好病魚，所謂與「白點共存」，就係咁意思。

作者: 小魚毛 時間: 2023-7-1 13:38:18

本帖最後由小魚毛於 2023-7-1 13:39 編輯

要搞清楚，搞好水質唔會隔絕白點，兩者根本唔係對等關係。但水質問題仍然係要處理，你2.5L環對應兩尺缸（估計60L水），絕對係唔夠，所以問題係唔夠地方養硝化菌，再倒菌水落缸都無用，加環好過。一般生物環都有NO3偏高問題（包括你隻PH環），唔啱RT用，你最好再做o下功課，搵過隻啱RT用o既濾材。

即使你決定放棄RT轉玩FOT，NO3仍然係理想o既水質指標，買翻盒試劑睇清楚，好過你齋靠NH3/4估估o下。係玩 RT o既話，PO4就一定要睇埋。

藍吊對白點非常之敏感，「白點王」o既外號唔係浪得虛名，新手或者水質未穩定都唔鼓勵試。

作者: tomasuairyo 時間: 2023-7-3 23:51:02

多謝小魚毛指教,詳細講解,比我上左一堂課
現況
而家減少左缸內生物(得返一條魔仔`兩隻蝦)
加左新既濾材(MarinePure波波)
環方面見好多C兄推 SERA環 (觀察現況,考慮之後再換)
亦都買左NO3 PO4 試劑
NO3 4,0 mg/l
PO4 0.8 mg/l
器材方面upgrade既是否指唔用濾桶?
用其他過濾方法?

作者: 小魚毛 時間: 2023-7-6 01:03:53

Marine Pure隻波皮好似只降NH3/4同 NO2 ，只啱FOT用，反而佢隻「神磚」就可以撳到NO3 ，RT都啱用。未開封o既話，不如拎返舖頭換咗佢。

SERA環都有好多隻，記住係 Siporax玻璃環，唔好買錯。

NO3 & PO4 、器材upgrade、濾桶、其他過濾法⋯⋯要組織o下先，畀啲時間我。

作者: 小魚毛 時間: 2023-7-14 15:15:55

NO3 4,0 mg/l
PO4 0.8 mg/l
NO3唔錯，但PO4就差啲。

我先試o下列出唔同珊瑚o既水質要求：

	NO3 (mg/l)	PO4 (mg/l)	水溫
SPS	0.3~3	0.03以下	24~26度
SPS(粗生--e.g瓦片、石瓦)	5~0.3	0.06以下	24~26度
LPS	10~3	0.1以下	24~28度
LPS(粗生--e.g草、菇、扣)	15~3	0.15以下	24~30度

詳細參數可以有好多項，我只列出最基本要求。留意畀你參考o既數值係一組組範圍，而唔係一個個數字，唔一定話NO3高過15就咩都養唔到，低過3就可以玩晒所有SPS，尤其個別地區或者品種o既珊瑚對水質要求會有上落，所以唔好死跟，一定要自己執生。養珊瑚就係養水，盡可能制水質喺理想水平（低NO3&PO4），係ＲＴ玩家o既基本要求。

香港水喉水o既NO3水平係10mg/l（水務署標明本港o既食水標準）。所以一般用水喉水開鹽o既玩法，極其量只可以養入門級o既珊瑚(粗生LPS)，因為目前未有過濾系統可以做到長期免換水，呢個就係水喉水玩家o既最大限制，要玩多啲LPS或者升級上SPS，只可以放棄水喉水而轉用其他水源，好多試養珊瑚o既玩家，都係因為水源問題而放棄。

你NO3唔錯，即係個硝化系統有效控制到水質，不過留意你缸新生物少，系統負擔唔大，如果你以水喉水作為水源，或者日後慢慢增加生物入缸，都會提升NO3，所以唔好大安旨意。

PO4問題，兩個可能原因：１）過濾系統未有針對降解PO4 o既濾材；２）生物石入缸前未Ｑ妥，太多生物屍體殘留腐化成PO4。目前PO4水平應該連軟珊瑚都較難keep到，日後都好易會出現爆藻等問題。一定要針對PO4做做功課。

作者: 小魚毛 時間: 2023-7-14 15:20:25

器材方面upgrade既是否指唔用濾桶?

用濾桶玩RT係唔方便，但唔係唔可能。既然已經開好缸養好水，除非你肯成套硬件放棄換背濾缸，否則就應該先Upgrade其他必須要有o既器材先，所有嘢都係$，呢個深坑唔易跳。

控制水溫應該係你目前最大o既投資，正常香港夏天室溫無可能低過三十度，除非你全日長開冷氣（不過電費更貴），否則無水冷機都好難可以喺香港養珊瑚。電子水冷免問，目前未有一部機啱畀一尺以上o既缸喺香港用(除非只求降兩三度水溫)，唔好貪平，盞嘥錢。細部壓縮機一兩千起跳，所以筆直應該係你最先要考慮o既問題。

再呢就係燈俱＆造流，兩樣都可以用平貨，唔算奢侈。一般LPS燈，有藍白同時間掣就夠（日出日落mode唔係必須），SPS級o既燈俱會貴過你部水冷機，未換燈就唔好諗。造流就更加豐儉由人，最基本較到流速，唔會打風咁就可以。

作者: 小魚毛 時間: 2023-7-14 15:23:29

用其他過濾方法?

要由濾材＆水源兩方面講：

濾材——選擇可以有好多：沸石、生物環、生物磚、藻屏\盒\桶、豆、ROWA......每樣都有唔同用法&硬件配合，你可以慢慢研究。

水源——除非你接受只玩粗生o既LPS，不否則放棄水喉水轉用純水或者廁所水應該係你o既終極選擇，不過兩樣都係要配合專用o既濾水器，又係＄o既問題。

作者: tomasuairyo 時間: 2023-7-28 19:50:14

再次多謝小魚毛教學講解
經過左E段時間,
期間不斷改善水質,裝備,等等`
再加左新濾材SERA環 ROWA粉等等
亦都買左唔同牌子既試劑測試
NH3/NH4 >0 SERA
NO2 >0 SALIFERT
NO3 > 3,0 mg/l colombo
PO4 > 0.1 RedSea
PH > 8.0~8.3左右 colombo
KH > 12? SERA 滴左12滴

裝置:
加左個UAS藻盒做實驗性質
水源方面改左用濾水器水
水冷本身都有,係差燈具

作者: 小魚毛 時間: 2023-8-1 17:56:55

tomasuairyo 發表於 2023-7-28 19:50
再次多謝小魚毛教學講解
經過左E段時間,
期間不斷改善水質,裝備,等等`

情況漸入佳境，以LPS呢講，水質達標，恭喜樓主！

細缸要配置器材比較簡單，係選擇多，要花時間做多啲功課。

ROWA係咪跟足指示份量落缸？如果係，就不防再重手少少，加多20~30%都唔會有問題。

KH滴咗12滴轉色未？如果未轉，就繼續滴到轉色為止。當然，你就咁當佢高過12亦無話唔得，但想知過咗幾多就可以咁滴法。

UAS本身係好概念，玩得好，佢係有可能成為主要o既過濾系統，不過要留意佢要求塊藻屏要有一定size(跟魚缸水量成正比)，至會見效。而家作為副助性質，樓主又有位安置佢，一試無防。不過要定期收割除藻，否則會有反效果。

濾水器係指家用濾水機？RT濾水用o既純水機，關鍵部份係RO & DI兩枝濾芯，家用濾水機技術近年百花齊放，亦都有個別型號附有RO\DI濾芯。不過要留意，家用濾水機o既定位係飲用水，而商家多聲稱飲用水o既軟硬度會影響人體健康，所以佢地會刻意調節KH，呢個有可能係你個缸KH偏高o既原因。所以如果你用緊家用濾水器，先要查清楚過濾後o既水質狀況，首要係能降NO3 & PO4到零或者近零水平，否則部機就唔啱用。其次就係KH，睇o下佢有無水質軟硬度o既選項，無o既話就要諗諗後天補救，過低可以用補充劑，過高o既話就幾頭痕；不過如果你唔玩SPS，咁問題都不大。

水冷關鍵係要將水溫降到28度以下，特別係喺呢幾個月最熱o既天氣。

FOT可以完全唔要燈，但珊瑚唔得，光線係佢地其中一種食物來源，所以最cheap o既藍白燈係最基本，落珊瑚前點都要有一枝。

作者: tomasuairyo 時間: 2023-8-2 23:31:57

小魚毛發表於 2023-8-1 17:56
情況漸入佳境，以LPS呢講，水質達標，恭喜樓主！

細缸要配置器材比較簡單，係選擇多，要花時間做多&#2 ...

ROWA係咪跟足指示份量落缸？
>係.第一次用..初初見有D啡色水溜出黎,所以跟指示落,近排發現D活石上面生左D紅色一條條好短既藻生左出黎...唔知關唔關事

KH滴咗12滴轉色未？
>滴咗12滴後就轉色

濾水器果到要再研究下,而家果個普通屋企家用濾水機,無得搞個KH,所以應該唔關事

作者: 小魚毛 時間: 2023-8-4 00:35:52

tomasuairyo 發表於 2023-8-2 23:31
ROWA係咪跟足指示份量落缸？
>係.第一次用..初初見有D啡色水溜出黎,所以跟指示落,近排發現D活石上面生左 ...

ROWA有啡色殘留物滲出係正常，唔順眼o既話，下次落缸前用舊缸水沖沖佢先就得。

ROWA係高效吸磷劑，降PO4有利壓抑藻類生長，理論上加ROWA唔可能助長藻類生長。所以你要檢查清楚，石上o既更大機會只係ROWA o既殘餘物，過兩日就會消失。又不過如果真係藻類，咁應該係生物石有寄生物屍體殘留腐化，產生PO4吸引藻類生長，係咁就要再增加ROWA份量。

無得調較KH唔等於唔關濾水器事，正如我之前咁講，家用濾水器唔係預你用呢養魚養珊瑚，好多商家會刻意調配濾芯成份以控制KH供人飲用⋯⋯所以要查就必須驗驗過濾前後o既水質，做AB比較，就清楚係咪關部濾水器事。

歡迎光臨海水領域 SeaFishZone (http://seafishzone.com/)