換大缸,求指導及設計.

joesaga

玩左RT九個月, 踏入夏季. 缸內的珊瑚不敵高溫一件件咁死去. 同家人商量後決定反正要買水冷,咁不如連缸都換過大的. 一次過以後唔好再癢癢.

現在的缸.  60cm背瀘缸約100L水. 化痰是 BM-QQ . 普通大陸泵.  wp-10造流.  RT.

新的缸希望造  120 x 60 x 60 cm ( 或者師兄提意個深度同高度可以點改. 長度就要 120 ) .  滴漏缸. 化痰打萛用BM Curve 5 or 7.  上水泵又要幾大先夠力呢?

另外, 請問下面的沙缸應該點樣佈排. 分幾多格. 化痰要點樣放, 水喉. 閘制應該點樣配置及佈排. 求指教. 雖然玩左九個月.  但還是新手一名.  希望各位師兄熱烈討論, 多多指教.

新缸目標係瑚仙缸.  

燈我本身之前已經預左會換缸, 所以係用緊 maxspect R420R 160W 那支, 所以應該夠用.

timothy898989

我玩左半年，都打算轉缸，不過係轉番高缸(之前矮缸)

alfa

120 X 70 X 50

alfa

BM Curve 5 唔夠,用BM Curve 7剛好,BM Curve 9最基本

nickdo

120X70X60
設備呢D野都係睇你預幾多錢玩,
BM CURVE 一般般, 有BUDGET就用好D.
上水泵用大陸野就行兩隻5000L/H雙上水
整埋個藻缸就3格. 唔用就2格.
個櫃就造90高.
支燈唔夠 COVERAGE 要換.

vsvs

高度隨你喜歡，視乎你玩乜珊瑚
只要記得預２∼３”作水位，造浪水位會上落
舖唔舖底沙又要考慮，如要厚底又要預多３，４”（不過好少再咁玩）
滴槽又睇你點玩，如玩３面就側滴等，３呎缸其實放邊面都冇所謂，家居擺位你自己先知
沙缸唔一定左去右或右去左，又睇你櫃門開那邊，沙缸通常同主缸一樣深，兩倉已夠，有藻缸咪加多倉
每倉大細又要考慮用咩器材
樓主諗清楚先，魚缸其實好ｔａｙｌｏｒｍａｄｅ

joesaga

alfa 發表於 2014-8-27 19:21
BM Curve 5 唔夠,用BM Curve 7剛好,BM Curve 9最基本

Thanks alfa 師兄.   兩,三年內我都應該唔會再換魚缸了.  所以 就按師兄的建議. 用. BM Curve 7.  9 好像勁左d.同埋價錢貴一倍. 我預算唔係好多.  所以都係慳住用. ^^

joesaga

nickdo 發表於 2014-8-28 01:59
120X70X60
設備呢D野都係睇你預幾多錢玩,
BM CURVE 一般般, 有BUDGET就用好D.

thanks nickdo 師兄建議和回覆.

雖然今天得到家人的同意. 但其實自已budget 都唔會好多.  化痰就會用BM Curve 上水泵要用兩隻咁堅?? 另外我見平時D師兄講的. 什麼PJ4500..呢D係乜牌子黎?

做藻缸咁係咪櫃入面都要有燈呢?  師兄方唔方便影下你沙缸上黎分享下.  我想睇下. 點攪法.  

燈果度. 我到時試下先. 因為買果時都問左. 佢話換個120度的燈片. 就會cover 到.. 咁佢都比左.D 片我.  以家係90度的.

joesaga

vsvs 發表於 2014-8-28 08:43
高度隨你喜歡，視乎你玩乜珊瑚
只要記得預２∼３”作水位，造浪水位會上落
舖唔舖底沙又要考慮，如要厚底 ...

Thanks vsvs 師兄建議及回覆. ^^

以家個缸就鋪左層薄的幼沙底. 初開缸時感覺上係靚D.  但之後起啡苔就麻煩. 同埋D水流攪到有D位見底.  所以我都仲考慮緊鋪唔鋪沙好.   但唔鋪沙.. 得個玻璃底又好似好DRY咁.

滴槽因為家居擺放條件. 已打萛設於側邊.   

沙缸度. 真係無乜概念.  師兄方唔方便影下你個沙缸比我睇下.  等我參考一下.  ^^

nickdo

joesaga 發表於 2014-8-28 09:39
thanks nickdo 師兄建議和回覆.

雖然今天得到家人的同意. 但其實自已budget 都唔會好多.  化痰就會用B ...

Laguna Powerjet 來佬野, 4500都千幾銀. 中價位黎講算係咁上下, 各方面中規中矩. 但你個缸至少8000流量. 如用PJ9000就差不多2千了.
大陸泵就慳電, 平, 發熱量低, 水冷都著少D, 但易壞, 所以最好雙上水. 其實就算來佬野都建議雙上水, 壞左一隻都唔怕反缸.

泵係7X24不停咁行, 所以選個慳電的一年電費都慳幾舊水, 仲未計水冷著少D.



用藻缸用配支草缸的夾燈或者70W鹵素夾燈.

joesaga

nickdo 發表於 2014-8-28 10:07
Laguna Powerjet 來佬野, 4500都千幾銀. 中價位黎講算係咁上下, 各方面中規中矩. 但你個缸至少8000流量.  ...

咁就用大陸泵啦. 大陸泵有無邊隻牌子. 或型號建議呢. ? 等我可以去淘寶搵下. 睇下有無都好. 唔該哂 nickdo.

師兄. 方唔方便整張沙缸相黎參考下唧. ^O^

alfa

joesaga 發表於 2014-8-28 09:31
Thanks alfa 師兄.   兩,三年內我都應該唔會再換魚缸了.  所以 就按師兄的建議. 用. BM Curve 7.  9 好像 ...

買大D養多D

nickdo

joesaga 發表於 2014-8-28 10:27
咁就用大陸泵啦. 大陸泵有無邊隻牌子. 或型號建議呢. ? 等我可以去淘寶搵下. 睇下有無都好. 唔該哂 nic ...

直流泵都係捷寶GA JA, 買大一號用低D流量黎行係最慳電. 如用2隻DC5000就足夠的話可以用2隻DC9000/12000剩係開最低流量黎行.

不過以前果一代DC5000/DC10000大部份都過唔到一年壽命. 唔知第二代有冇改進.

joesaga

nickdo 發表於 2014-8-28 15:41
直流泵都係捷寶GA JA, 買大一號用低D流量黎行係最慳電. 如用2隻DC5000就足夠的話可以用2隻DC9000/12000剩 ...

剛剛上淘寶睇左師兄介紹的泵. DC9000. 四百幾人仔一個. 價錢都OK喎.  咁就用呢隻啦.  但如果行兩隻.. 咁應該點樣放? 同埋沙缸同主缸呎寸既比例又係點呢?? 請師兄指教.

nickdo

joesaga 發表於 2014-8-28 16:11
剛剛上淘寶睇左師兄介紹的泵. DC9000. 四百幾人仔一個. 價錢都OK喎.  咁就用呢隻啦.  但如果行兩隻.. 咁應 ...

個櫃入面我會獨立整個高身缸方便換水, 係總水體5分1度.
沙缸的話你用BM之類的化氮雖然較細,  但盡可能做大D比第二時升級有位放. 如果你個主缸做60闊, 咁沙缸應有50闊. 咁第一格做35~40的話就好多化氮都放得落. 其餘空間睇你想點. 上水位通常較入咁D喉就無咁阻位, 無咩特別的, 沙缸點做係睇你用咩器材.

joesaga

nickdo 發表於 2014-8-28 17:30
個櫃入面我會獨立整個高身缸方便換水, 係總水體5分1度.
沙缸的話你用BM之類的化氮雖然較細,  但盡可能做 ...

感謝nickdo 兄耐心指教, 你的建議正好解決左我一個問題. 就是換水.    我個缸諗住做1.2M闊.. 咁下面應該都幾多位整野的.

小弟手畫左張圖.  大大們幫手睇下我有無理解錯誤和咁樣SET得唔得.   另外. 水冷機係咪應該放係櫃出面. 咁樣先散到熱??

nickdo

第一個格直接化氮, 第二個格上水.
第一個格入面你可以造個格放棉又得, 直接放網袋又得.

joesaga

nickdo 發表於 2014-8-29 11:30
第一個格直接化氮, 第二個格上水.
第一個格入面你可以造個格放棉又得, 直接放網袋又得.

咁鈣反同豆豆樽係咪放係上水泵果格呀. !?

nickdo

joesaga 發表於 2014-8-29 12:29
咁鈣反同豆豆樽係咪放係上水泵果格呀. !?

鈣反可以外置都得, 內置的話泵浸水又會熱D. 唔玩SPS無需要加.
豆豆樽出水要對正化氮入水. 放係邊都無所謂.
玩LPS可以用藻缸都得, 同主缸開燈時間相反, PH穩定D, 又可以養D小蝦小蟹海馬之類的生物.