|
好多人問我有關豐年蝦卵孵化問題，響衣度我一次過將小弟嘅失敗經驗同大家分享
大約會就下面四個部份講
- 豐年蝦卵選擇
- 豐年蝦卵孵化
- 卵殼bbs如何分手
- bbs有效儲存方法
一、豐年蝦卵的選擇
地區性：美國？俄羅斯？中國？阿根廷？？
好多人問，唔同嘅地方有咩唔同呀？美國係唔係一定好啲嫁？
其實唔同地方出嘅豐年蝦卵唔同嘅地方係個蝦種嘅分別，而蝦種嘅分別在於 1. 啲蝦出世之後強唔強壯，會唔會好快死，有好多國產嘅種出世時已經見倒佢地好弱，第二日全部死比你睇 2. 啲蝦長大後可以去到幾長，美國Great Salt Lake 果啲可以去到1.5cm，國產果啲如果養得大只可以去到1cm 3. 啲蝦嘅性別，Great Salt Lake 果啲完部都係Famale，孵出嚟啲BBS比較紅，male果啲比較冇咁紅 4. 啲蝦識應到咩嘅溫度，一般豐年蝦過大31度就會死比你睇，低過20度就唔識長大，而阿根廷果啲可以識認個range係最大嘅，不過唔知邊度有得賣，我仲source緊你有得賣話比我知
孵化率
一般香港巿場買倒嘅蝦卵都可以做倒100%孵化率嘅，不過我都買過一隻唔記得嘅牌子細細罐藍色嘅話係蘇聯卵80%孵化率，但最後發現70%都唔夠
當然我所講嘅係用佢地罐上話嘅孵化環境去孵啦，溫度呀，鹽度呀，孵化密度呀...
有兩個方法可以知道個孵化率嘅
1. 用35ppt，即海水嘅鹽度去孵化，溫度唔好超過聶氏28度，唔好低過26度，打氣24小時後等候分鐘，虹吸底果啲蝦同殼出嚟，一般只會見倒唔夠1%嘅卵殻，見倒好多殼（即係沉卵）就即係孵得唔好，一係自己做錯嘢，一係個100%孵化率是騙人的，個人經歷淘寶果啲真係.....
2. 衣個方法會精準啲，同一個白色碟仔，加1cm 35ppt嘅海水上去，之後數100粒卵加落去（是咪開始覺得我係癲嘅） ，等24-36小時，數下有幾多粒出左世，一般正貨會全部出世的
孵化密度（個人應為很重要）
孵化密度好重要呀，香港地少人多，想搵個地方比啲蝦卜嘢都冇，用一個1L嘅容器一條氣喉打氣，梗係想孵得有咁多得咁多啦係咪先
一般牌子會見議你1g/L，我就發現一般2g/L都可以。但係一貪心去到2.5g/L就會全軍覆沒。當然脫殼豐年蝦卵係會可以孵得密啲，但是筆直有限，儲存脫殼蝦卵又唔方便所以不在此討論。
話說有啲卵場好好，會處理過啲卵，卵殼乾淨一啲，我用緊果隻可以去到3g/L都完全冇事，啱哂我衣啲劏房戶
營養
營養嚟講呢，睇顏色就最易睇倒，孵出嚟嘅BBS越紅或者越橙就越高營養，不過提一提大家出世後BBS響26-28度環境下6-8個小時就會由instar1 變instar2佢地就會用哂egg Yolk入面嘅營養，變得透明，咁啲魚食完都唔會有營養。另外BBS 係冇乜不飽和脂肪酸酸即DHA/EPA，初生魚仔淨係食BBS的話係會唔夠營養，所以一係餵enrich 左嘅 copepod 一係餵enrich左嘅第二日豐年蝦
BBS大小
衣個關係於魚bb個口大小，同埋個隔蝦網大小。其實大約最最最大同最最最細嘅豐年蝦差30um左右啦，我就覺得大啲開心啲，BBS大啲食幾隻就夠。
下面會同大家分享點樣同一罐蝦卵可以孵唔同size嘅BBS
二、豐年蝦卵孵化
溫度（好重要）
信我，所有孵化條件當中，小弟覺得溫度係最重要嘅，因為小弟次次都係衰響溫度手上
一句講哂總之要保持響26-28度之間，就最好
高過28度會點呢？冇事嘅，佢地會快啲出世，不過小心，如果高過來說度佢地就會瓜柴
低過26度會點呢？佢地會要更多嘅時間先會出世，嗱嗱嗱，問題就出左響衣度啦，當你習慣左24小時佢地出世，但係有一日凍左！佢地36小時先出世，你早左收佢地，用個網隔左佢地，佢地就會一係整爛左佢，一係冇再打氣缸氧而死
人類總是重複犯錯。有個方法可以避免，就是收蝦之前用支droper好咩都好，吸小小出嚟睇睇佢地出左世未，有幾多成出左世，差唔多隻隻都識得郁先好收。
咁如果想每日都可以準時收蝦又可以點呢？可以參考以下做法，將孵化容器放響一個有一支暖管嘅warm water bath（魚缸如果係暖嘅有位梗係好啦） 入面，水浸過個容器一半以上。最好加多一支U形溫度計睇下幾多度就最安心。
我試過一支暖管插落孵蝦個容器入面，發現有時暖管表面唔知係咪熱得濟，會整死左一部分嘅BBS，所以用water bath 會好啲。
收蝦時間
一般蝦卵個罐都會寫住幾耐會孵出，大約都係26-28度入面24小時會孵得出嫁啦。
都係果句避免人類重複犯錯令蝦仔早產而死收蝦之前用支droper好咩都好，吸小小出嚟睇睇佢地出左世未，有幾多成出左世，差唔多隻隻都識得郁先好收。
接住落嚟會教大家點超頻，可以快啲孵出！
鹽度
吓鹽度？唔係用一般海水就得嫁啦咩？係，不過鹽度可以影響孵化速度同BBS大小！
一般蝦卵都可以用5ppt - 35ppt 嚟孵出，越低鹽度，孵得越快，孵出嚟嘅BBS越大。
相反，如果魚仔個口細，想BBS細啲可以用高啲鹽度，咁孵出嚟就會越細，亦都會要花多一啲嘅時間去孵化。
孵化密度
孵化密度直接影響孵化率，一般來說，密度越高，壞水機會越大，BBS出左世可能會因為比啲污水毒死卅毒到好弱。
總之跟返包裝上的指示就冇死。
打氣量
一定要夠，尤其是孵得密，BBS其實唔會就比啲current打死，所以放心，反而孵得密嘅時候會缸氧，打得少會死。
不過注意啲卵打左上岸衣個問題。
光線
我發現有光同冇特別加光源分別唔大，反而加左要小心溫度過高。
容器
最方便小弟建議一個平底嘅杯就得，一支硬嘅uPVC喉打氣，非常方便。之前買過AB果隻，中哂伏，勁唔方便又貴
三、卵殼bbs完美分開
虹吸
孵完之後停止打氣候分鐘啲蝦BB好快就會碌到落底，用一條uPVC加軟喉就可以吸哂佢地，先吸佢地去另一個容器備用。
咁樣做如果用35ppt 嘅鹽度，已經可以分開倒九成嘅卵
我有一次停止打氣之後出左去做啲緊要事情...一個小時先後返到嚟全部死哂嘅底
隔
要分開最好用網嚟隔，一般80目或者100目就可以隔得倒嫁啦，一個80目響上面另外一個密啲嘅響下面，攞啲水慢慢沖沖佢就可以開倒嫁啦（淡水唔係咁好嘅，不過唔係好多沖得唔耐都可以嘅），真係一粒卵殼都冇嫁
其實好多魚食倒個蝦殼都會嘔返出嚟嘅
四、BBS有效儲存方法
低溫加乾淨海水
要儲存活嘅，首先要啲蝦卵質素好啲先得，啲BBS要好生猛先得。隔好哂啲水同埋殻之後就將佢地加落一之乾淨嘅海水入面，放入雪櫃唔好襟住佢，比佢有機會透下氣。啲水夠乾淨可以放倒兩至三日
冰鮮都唔錯
其實隔好哂啲水同埋殻之後攞個保鮮袋仔裝住放入雪櫃冰鮮左啲蝦仁都係一個唔錯嘅選擇呀
今日打住咁多先，啲圖聽日先加落去。
多謝欣賞
| 
[URL=http://s974.photobucket.com/user/wingk960/
發表於 2014-5-9 00:53:38
收藏
支持
反對
發表於 2014-5-9 01:05:03
又學到野
