新手養水母問題？

天智

請問香港仲有冇水母賣，難唔難養？

pca

海X世界間吾仲有，難養

小魚毛

唔係難養，係好很難養！！

無養過，不過都有留意相關資訊，可以分享o下。

水母係獵食性生物，佢觸鬚上o既刺細胞帶有毒性，雖則話某啲品種毒性溫和，但每個人體質唔同，對毒性出現過敏或者嚴重反應o既風險始終存在，帶佢返屋企前一定要諗清楚。曾經有廠商推出養水母專用成品缸，亦都有試過水母專門店開業，但在本地能夠成功家居飼養o既個案似乎絕無謹有（希望有其他魚友可以分享成功經驗）。

已知要求飼養條件如下：
１）水質：水母係珊瑚近親，所以對水質要求不下於珊瑚，好似fot咁用水喉水開海鹽應該都玩唔到，NO3、PO4都太高，純水或者廁水似乎係基本要求。每星期換水，留意換水唔可以直接倒水入主缸，否則水流有機會傷害到水母。
２）水流：要有非常緩慢的環型水流，要確保水母可以伸展觸鬚，但又要避免過急水流傷害到水母，亦都要避免食物碎𥔭沉積缸底破壞水質，咁o既水流根本唔啱魚或者珊瑚生存，所以都無可能同其他生物混養；再者個缸o既水泵一定要可以調教流速，我懷疑市面有幾多水泵可以咁樣玩「慢流」法。
３）光線：水母同珊瑚一樣，體內有共生藻，所以都要有光線畀佢，不過就要求唔算高，一般中下價o既珊瑚藍燈都應該夠照。
４）水溫：水冷都係必須，一般建議水溫設定o係25度或以下。
５）餵食：應該無乾糧啱用，暫時知都係活豐年蝦幼體適合餵飼水母，每天小心餵食之餘又要維持水質，我懷疑一般家居飼養有無可能做到。
６）生命週期：最後一點亦都係最主要原因，令到一般飼養者卻步的，就係水母生命週期太短促。自然環境下，一般水母大概有半年命，而人工環境更只有幾個月。所以就算你搞一大輪買齊設備開到個缸，真係成功養到，都不過係幾個月o既貨仔，除非你好以水族館咁有資源搞繁殖，否就只可以不停咁「買、死、再買、再死......」

所以講到最尾，我只有三個字：「算把啦！」唔係想撥冷水，事實上好多生物根唔適合家居飼養，海水公園或者其他水母展館o既入場券，絕對唔係謀取暴利！如果樓主或者有魚友真係養到，我相信絕對有資格開放個缸收錢畀人參觀。

天智

唔該