新手請教，如何把珊瑚從frag座移到活石上？

ho011025

新手問題，請各位c兄指教

小魚毛

軟硬唔同玩法：

硬珊瑚可以試o下直接用手摵落呢，如果太實摵唔到，就可以擸架生：
去五金舖買把最細o既剪鉗就得。

軟珊瑚就唔好咁玩，更加唔好諗移佢離開個frag坐，好多玩家會將成個frag坐直接痴死喺石上面，或者再暴力啲，剪走frag坐隻腳，方便痴上石。

又不過建議樓主新買珊瑚唔好急住即刻上石，珊瑚落缸係要試位（特別係SPS），唔同位置唔同光度&水流，每件珊瑚都會有唔同要求，要慢慢畀幾個星期佢試啱位，一落缸即痴死就無彎轉。


我自己就再極端啲，全缸珊瑚都唔上石，全部都可以郁，好處除咗方便走位之外，有問題要dip或者起石洗沙之類都方便啲；但亦都有缺點，啲珊瑚較易畀其他生物撞跌，成日要留意要執，跟得唔好都會影響到啲珊瑚o既狀態。

ho011025

感謝c兄指教,我自問應該沒有本事玩SPS,所以只會玩軟珊瑚

如果要把FRAG座痴上石,要用什麼痴呢?

小魚毛

ho011025 發表於 2022-3-5 09:42
感謝c兄指教,我自問應該沒有本事玩SPS,所以只會玩軟珊瑚

如果要把FRAG座痴上石,要用什麼痴呢?

應該講清楚啲，有骨o既LPS同SPS一樣做法，i.e.火柴、提子、啫哩、波子、豬肉、寶石花⋯⋯呢啲都可以摵可以cut；無骨o既LPS就唔郁得，i.e扣、千手、皮革、手指⋯⋯呢啲只可以等佢「自然上石」。

雖然有痴珊瑚專用膠水，不過暫時我覺得最低用仍然喺「AA超能啫哩」：

同一般文具舖o既細支筆裝『AAg超能膠」唔同，呢支係啫哩狀，會易用好多；而更重要係呢支嘢有成20g，都係賣卅四十蚊。大間o既文具舖、五金舖，甚至一啲魚舖都有賣。

佢可以痴生物石（大件或者太重就未必夠力）、珊瑚骨（i.e.有骨珊瑚o既腳部）、珊瑚上frag座，或者將frag坐痴上石。濕水都痴得，不過離水痴會乾得快啲。

另外會有一啲牌子珊瑚膠，大概似五金舖賣o既剛膠卅鋼塑土；亦都有軟珊瑚（i.e.無骨珊瑚）o既專用膠水，但我未用過，唔知好唔好用。