新手RT缸擺位一問

momomomo

想問各位對依個新手RT缸既擺位有無咩建議?
成日見到師兄D缸個景擺到好靚, 硬係覺得自己D石砌得唔係好實用諗緊點樣加多D石可以放多少少珊瑚

ybkwok

你而家擺到好似賣珊瑚咁

ybkwok

擺多啲生物石，珊瑚可以擺不同高度，前前後後咁就好啲

小魚毛

ybkwok 發表於 2022-5-13 18:08
你而家擺到好似賣珊瑚咁

新手最直接o既資訊來源就係舖頭，難怪會咁「有feel」。

無人會一開始就識砌，建議樓主睇多啲其他人o既缸，吸收多啲慢慢會有改善。

留意你個算係細缸，細缸o既砌石法其實同大缸唔同，所以你應該主攻nano缸造景，例如呢個網站：
https://www.nano-reef.com/

小魚毛

你自己都知道，砌石講求兩方面放果：美感&實用，兩方面都要同時兼顧。

美感比較主觀，各花入各眼，不過大路o既取向都係講求自然美，有處身真實珊瑚礁的感覺。樓主唔滿意而家個景，可能就係因為擺位太整齊太人工化，所以有「舖頭feel」。你未必會去潛水，但真實珊瑚礁景色，其實都唔難睇到，我自己就鐘意睇海洋生態記錄片，特別係同珊瑚礁生景有關o既，除咗睇到生物o既習性，亦都可睇到真實自然o既珊瑚景色，你會發覺到某啲種類珊瑚只會喺某啲位置以特定o既方式生長，除咗有助砌石造景之外，對於飼養唔同生物同珊瑚都好有幫助。

如果你有涉獵過美術，或者攝影，你應該聽過所謂構圖法側，講o既就係跟從某啲方法、原則去建構圖畫、相片o既畫面，表達自然美。聽啲前輩講過，呢啲理論好早己經被引入到魚缸造景內，簡單講就係要造到個缸景疏密有致，有焦點有空間感、有前後景的立體感等等o既視覺效果。你可以用「留白」、「三七分法」、「黃金比例」、「黃金分割線」⋯⋯搜尋o下，有關o既資料應該唔難搵到。

小魚毛

實用方面，除咗裝飾之外，生物石更加係魚缸硝化系統o既一部份，除非你個缸o既過濾系統好強勁，否則石o既數量唔可以太少，亦都唔可以用假石（人造石除外）。唔知你個缸過濾系統咩情況，不過就咁睇，你仲有位可以加多啲生物石再砌砌個景。

唔同形狀o既石有唔同砌法，平板塊狀石提供最多空間擺放珊瑚，粗厚o既石或者枝狀石可以作為承托、疏通水流、制造空間供生物躲藏，所以揀石不防選擇唔同形狀，咁個石景可以有更多變化。唔同種類o既珊瑚對光照要求都唔同，所以個景應該要喺唔同高度都提供到平面擺放珊瑚。

砌石除咗要提供空位擺放珊瑚之外，更加要留意全缸水流，唔可以將啲石舖晒喺缸底，或者靠埋貼住晒缸背，咁樣會導致水流唔通，呢啲死角位會有垃圾積聚影響水質。砌石亦都唔好貼近玻璃面，否則呢啲位會特別快起苔，如果太貼連磁刷亦都過唔到，咁清潔就會好麻煩。

進階o既砌石法唔會單純喺擺放堆疊，更加會鑿石塑形，利用鑽孔、索帶綁札、黏合等方法塑造特定形狀，黏合劑除咗專用

補充內容 (2022-5-15 23:49):
o既珊瑚膠卅畢地外，亦都可以用鋼塑土（五金舖）、快乾英泥（防水材料店）、塑型樹脂（美工用品店），除咗加固個景，防止山崩之外，要砌咩特別形狀都會得心應手好多。

momomomo

謝謝各位回覆, 睇黎要再參考多D資料. 見D珊瑚都叫做keep到一段時間, 係時候研究下擺位問題

momomomo

砌好左個新景打算取代右面個堆, 浸佢幾日先, 希望放落去會好睇D LA

小魚毛

momomomo 發表於 2022-5-26 15:29
砌好左個新景打算取代右面個堆, 浸佢幾日先, 希望放落去會好睇D LA

新景