氯化鉀

菜鳥333

見台灣處理活石用到氯化鉀（日本久島果隻牌子），請問香港邊到有得賣？
吾用氯化鉀仲有咩方法處理活石？

小魚毛

Potassium Chloride，我估你可以喺化工原料舖或者淘佬搵。

不過問題唔係你搵唔搵到氯化鉀，而係你點可以做到你想「處理」活石o既效果？

其實根本無方法可以好有效咁殺死活石中啲怪獸，而又唔會傷害到啲無辜o既平民百姓。除非舖頭先將活石變死石，有害o既蝦蟹好，有益o既軟體硝化細菌又好，全部都有殺錯無放過，然後再花時間重新「養石」。呢種「置諸死地而後生」o既做法，其實同一般魚友處理活石無分別，唔同o既只係舖頭幫你做埋最後一步，至賣啲石畀你。但除非舖頭肯花長時間去重新養石，否則咁樣處理o既石，雖然安全，但除咗硝化菌之外，啲石就咩都唔會有，無紫苔、無軟體寄生，菌種同生物多樣性都會大打折扣。

要將生石變死石，本地魚友一般會用雙氧水，藥房就有，唔難搵；而且好快會自然揮發，唔會有咩毒性殘留，更安全可靠。另外，一啲平時用呢「Q」珊瑚o既藥水，例如兩條小魚o既「ReVive」，都可以有效驅除活石表面o既生物，但就真係僅限於表面，比較大o既、或者匿喺石入邊深處o既，就無能為力。

要安全定要生鮮o既活石，只可以二揀一，至於用唔用氯化鉀，我相信會無咩分別。