準備入坑, 1呎缸 應該揀 背濾 / 濾筒 ?

YwS

打算開一呎缸, 主要養魚, 會嘗試養唔養到1,2隻葵

以前養淡水有個掛濾, 但偏細應該用唔番..

諗緊應該買
1) 1呎背濾缸+蛋分
2) 普通1呎缸+濾筒+外掛蛋分

過濾能力邊樣好??  清洗係咪濾筒方便D?

上次魚街搵1呎背濾缸只係見到個2格.. 如果買普通1呎缸好似容易D

royroyroy0112

太大或太細既缸對新手黎講，都係好難玩，建議100升水左右既缸較岩你

calvinfff

royroyroy0112 發表於 2021-7-2 13:40
太大或太細既缸對新手黎講，都係好難玩，建議100升水左右既缸較岩你

x 2

有位的話買個18-24吋背濾

YwS

真係無位.. 所以有諗過試下得唔得, 真係搞唔掂就轉番養淡水算

thomaschan2014

一呎？如果你係高手的話，應該無問題，不過你唔似係高手，因為其實海葵絕對唔易養

萬寶路

背濾方便過濾桶,濾桶每次換綿都要抽起D環

YwS

thomaschan2014 發表於 2021-7-2 15:59
一呎？如果你係高手的話，應該無問題，不過你唔似係高手，因為其實海葵絕對唔易養

係嫁, 新手發問區問野我就緊係新手喇會試, 養唔掂就FOT, 再唔掂咪轉番淡水囉

爬過文都有唔少一呎缸既成功例子,
只係想先問下高手們意見, 先揀好設備, 唔想浪費.

小魚毛

樓主似乎心屬濾桶，但事實講功效、講方便，背濾都喺濾桶之上。

裸缸加濾桶再加外掛化氮，左一抽右一o舊咁，點可能慳位得過將整套過濾系統連化氮都收喺缸背o既背濾缸？打理維護都一定係背濾完勝濾桶。除非你刻意買個大濾桶，否則講效能，仍然係背濾行先。講真，跳得海，我諗唔到有咩理由唔用滴漏系統而揀次一級o既濾桶。除非你諗住留翻條後路畀自己，玩唔掂都可以由鹹轉返淡⋯⋯

多隻香爐多隻鬼，多隻海葵就多好多器材！唔同FOT，有海葵就變成混養缸，燈同水冷就變成必須品，就算係最平最粗生o既奶咀，最cheap o既珊瑚燈點都要有一支。水溫唔可以高過30度，否則未到夏天你隻奶咀就己經溶咗。一尺缸30L水，最cheap o既電子水冷仔其實只可以好勉強咁keep到30度，而且未必玩到一年⋯⋯

另外奶咀習慣通缸走，你又濾桶又外掛化氮，即係多兩個吸水位畀隻葵有機會吸入去自殺⋯⋯如果你仍然堅持要行濾桶o既話，咁就請考慮清楚係咪放棄玩葵。

唔同淡水魚，海洋生境同我地距離太大，要將海洋生物搬返屋企就係一件咁麻煩o既事，值唔值得花咁多錢咁多心機同時間，就只有你自己至知。

YwS

小魚毛 發表於 2021-7-3 02:27
樓主似乎心屬濾桶，但事實講功效、講方便，背濾都喺濾桶之上。

裸缸加濾桶再加外掛化氮，左一抽右 ...

多謝詳細解釋原本以為濾筒+外掛蛋分會仲容易打理, 原來唔係咁.
咁我應該會揀番背濾..
之前見到個12"X12"X14"高, 可惜得2格.. 要再搵下
thanks.

小魚毛

一尺缸間三格o既背濾，應該唔難搵，樓主不防行多兩轉慢慢搵o下。

反而搵化氮你會更頭痕，無幾多針刷化氮放得落一尺背濾嗰一細格，搵唔到就要考慮氣木化氮，不過一樣唔易搵，仲要配靚木靚氣泵至可以發揮得好⋯⋯

唔用濾桶，個位可以留翻呢放水冷。大部o既電子水冷魚街一般都上千，淘佬會平翻幾百，諗得過。不過如果夠位，最細部o既壓縮機會係首選，筆直有限可以考慮二手，因為就算二手，都一定襟玩過電子機好多。

樓上ching無講錯，一尺缸的確難玩好多，因為水體細，水質變化可以好急速，瞓醒一覺就全缸死晒，幾年心機化為烏有⋯⋯呢個係好多ching放棄上岸o既最終經歷，高手新手o既差別就只在於可唔可以喺短速o既時間內觀察到問題及早補救。所以雖然只係缸仔，但配置器材反而唔可以入門級，因為系統是旦一part跪低，仲有其他設備頂住，緩延水質惡化速度，畀時間你去及早補救。

由淡轉鹹，好多固有經驗都未必啱用，開個一尺同兩尺鹹水缸，開支其實差別唔大。樓主要有定心理準備，所有嘢要重新學習，重新問人；先定好飼養目標，再規劃器材設備，計筆直，唔夠錢就再修定：收二手卅推遲計劃儲錢卅放棄飼養目標降低要⋯⋯玩鹹水就係奢侈，平民玩法大致上就係咁。