SPS 您會推薦邊間鋪？

小魚毛

其實都只係得o個幾間，仲要推？

個人認為玩鹹嘢要講夠「專」，專賣器材同專賣生物o既舖頭，一定比兩樣都賣o既舖項更專業。同樣道理，專賣珊瑚o既舖頭，一定會比又魚又珊瑚o既舖頭更熟悉珊瑚。所以邊間舖以賣sps為主，咪推得過囉。

大班係老字號，老闆都可以話係sps專家。
Sunshine Marine只賣珊瑚，所以都有好多選擇。
太平洋返貨都好快，軟硬都有唔少選擇。
東海以魚為主，珊瑚為次，sps只係間中返貨，而且以印尼為主，所以價錢較經濟，啱新手試玩，不過相對可選擇o既貨色就唔夠前面三間多。

小魚毛

先旨聲明，我無意偏幫任何一間舖。不過我始終相信舖頭愈多，魚友選擇愈多，咁至可以雙嬴。

當然，作為消費者，你絶對有權選擇去邊間舖、唔去邊間舖。

但都要知道，珊瑚同好多比較稀有o既魚一樣，佢地唔會一路留o係舖頭等你去買。佢地貨源不穩，貨價亦十分浮動，好多時一間舖o既貨就真係只此一間，去第二間都唔會搵到（當然你肯等佢三幾個月呢翻貨咁又另計）。所以「唔去邊間」，或者你真係可以表達對佢服務態度卅銷售手法等的不滿，但同時你亦都減少咗自己o既選擇機會。如果啲珊舖開到好似七仔咁，去少一間當然無所謂，但全港計埋以賣sps 為主o既舖頭，五隻手指數晒重有剩，玩杯葛「唔去邊間...」，其實就係雙輸。

所以我始終認為，揀舖頭不如揀貨色，信老闆不如信自己。而家資訊咁發逹，自己做多啲功課容咩易。識上呢問已經係一個好開始，多睇多聽多問，得益o既一定係自己。呢樹o既「商店通告∼生物」區，幾乎集齊晒上述各店o既返貨通知，留意住佢有貨返至上去逛，就容意揀到心頭好。

小魚毛

所以推舖頭不如推貨源，搵信得過o既老闆不如搵清楚啲珊瑚資料先。

珊瑚貨源唔多，sps其實就更少，簡單可以來貨地區劃分：
１）印尼：算最近香港，供應穩定，而且水質要求相對其他地區而言算較低，所以價錢較為經濟，較易養，算係新手入門之選，只不多數一般大路貨色，品種、色澤都不及其他地區吸引。當中又有人工培殖同野生之分，人工培殖會較易養，但可選擇的品種也更少。
２）澳洲：應該係印尼之外，最常見有sps供港o既產地，品種多樣化，而且色彩艷麗。但大堡礁水質好，所以澳洲珊瑚對水質要求亦高，加上近年受白化問題困擾，影響供應，所以價格一路上升。比較適合升級玩家。
３）其他地區：記憶中見過o既都係啲供應少、來貨唔穩定o既區域。東南亞有菲律賓、台灣、越南、海南島等，貨色一般，反而日本珊瑚較有質素。另外，菲濟、所羅門群島、帛琉都有過精品供港，不過近年買少見少。

其實每次返貨，舖頭都會標明貨源，玩家一睇就可以大略道咩貨色。

小魚毛

太記老闆佢o既服務態度啲確幾outdate，不過我買o既只係珊瑚，唔係service。
最重要o既係－－老闆無老點過我。「誠信」我認為對買sps呢類少眾中o既少眾貨品係至關最重要，因為選擇已經少，如果仲要畀人呃，就真係上岸唔玩好過。雖然有啲老闆會真心叫你唔好買呢件貨，狀態唔夠好、色水未夠靚之類......而太平洋絶對唔會畀到呢類服務。但平心而論，認真問佢有關珊瑚o既問題，老闆提供答案o既可信度都唔低，不過前題係，你問o既問題都唔可以太過腦殘，老闆啲確唔係有耐性同你亂吹嗰類人。
所以我只會少啲遊去太平洋，而唔會行人止步。

小魚毛

QTI 發表於 2018-4-27 00:43
多謝師兄賜教，我同意師兄講法，謝謝室錢入小弟個袋

樓主如果覺得有得著，我又亂吹多兩句。


除咗產地，sps其實都可以生長區域（深卅淺水）簡單咁劃分。
1）淺水區：指生長喺岩礁區淺水處o既珊瑚，呢區陽光充足，水流較大，所生長o既珊瑚都係對光照要求高，水流亦要大。對玩家o既燈俱同造流系統要求亦最高，缸內o既擺放位置亦都以山頂近水面、最多光照、最大流量為佳。
２）深水區：指生長喺岩礁區深水處o既珊瑚，呢區陽光穿透度不及淺水區，水流相對淺水區而言亦較平靜。 一般角友會將佢地放缸底或者石底陰影區，如果新手燈俱及造流系統比較陽春的話，可以試玩深水區o既sps，因為假如真係器材未到班，放佢地上缸頂o既淺水區都仲或者有得玩。
３）中層：顧名思義，介乎深水區與淺水區間o既sps，其實有時比較難介定，好多時難以清楚劃分，反而實際上會較多聽到介乎兩者間（i.e.中淺、中深）。總之有個概念就係要知支sps係咩水深生活，呢決定放缸位置。



所以揀品種係玩sps o既另一竅門。初階通常由深水區o既品種入手，瓦片、貓骨、雀巢之類，都係呢類別，入門試玩通常可以由佢地開始，成功後就可以升呢去玩其它o既角；至於士多啤梨、藍莓蛋糕、青蘋果、鷹爪之類，都係淺水區高難度o既品種（仲要係澳洲貨o既多）。入手前記得做好資料搜集，問清楚老闆，落缸後都仲要小心觀察，慢慢試個啱o既位置呢擺放。

小魚毛

QTI 發表於 2018-9-21 20:23
同意。

其實小弟對太平洋老闆都無什麼意見，聽完呢處D師兄分享，其實我覺得佢對我都頗有耐性。主要是見佢 ...

有鬼爪可以試o下斑馬蝶，呢招都係大班教o既。

小魚毛

QTI 發表於 2021-4-29 11:56
ching, 兩年半後，終於系大班鼠買到斑馬蝶！

斑馬蠂唔一定要去美人搵，好多魚舖都有返，東海甚至返過本地貨，不過一般都唔係成日有貨，一水水咁。
留意斑馬蝶好粗生快大，為食搶口兼粗魯，無咩飼養難度，但就因為快大，所以細缸最好盡量揀細魚，否則一年半載就會變惡爺。

小魚毛

littlejesus 發表於 2021-5-6 20:55
請教,，班馬蝶食珊瑚嗎，軟同硬？

鬼爪係珊瑚缸o既問題，會咬珊瑚仲點會推薦？

我養咁耐軟硬都無見佢咬過，放佢入缸都應該無咩錯。