旺角樓上仲有幾度有賣珊瑚?

小魚毛

其實一路都係正常價。

珊瑚平貴唔係單純由舖頭定價，更重要係來自貨價格，珊瑚o既來源地係決定佢定價o既主要因素澳洲貨，運費貴，定會自然高，印尼貨運費平，自然都抵買好多。

東海主要買印尼珊瑚，如果你見過佢啲澳洲珊瑚，就會發覺佢o既價錢一樣好唔「親民」（雖則價錢仍然平過FS好多），另外，東海對面o既宏達近半年都返過兩次印尼人工珊瑚，價錢都質素都好驚喜，不過幾個月至返一轉，樓主要自己留意收風。

小魚毛

講返魚街。

由旺角道數落去。怡輝大廈樓上有間有鹹有淡，器材同軟珊瑚都有賣；啟運皓海其實都有珊瑚賣，不過唔算多；魚宮隔籬都有一間，不過成日都唔開，好似己經⋯⋯啟運對面樓上美人魚主要係賣澳洲珊瑚，價錢平極有限；美人對面都一間新開o既珊瑚舖貨源同品種都幾多樣，可以望望。再行落去就應該係英榮樓，二樓梯口第一間（舖名唔記得），主要係軟珊瑚，印尼、菲律賓貨多，價格合理，貨色一般。最後係隔籬間南太平洋，佢o既貨源都主要係呢自南太平洋，應該係獨家貨，價錢介乎澳洲同印尼之間，種類同質素都唔錯，唔介意服務態度o既話，值得一去。

小魚毛

「新自由」我唔清楚，不過美人十幾年前喺砵蘭街舊舖己經係用「新美人魚」呢個名，所以估計唔係搬舖轉新名，而可能係借用以前啲「名店」個舖名，加上「新」字上去以免混淆或者侵犯版權。香港好多叫「新XX」o既舖頭（特別係食肆）都係咁樣改名。

小魚毛

loin20409 發表於 2020-4-3 10:20
謝謝師兄用心的回答, 但東海去不了
我指的價格升得多, 原因係4年前與現在, 由百幾升到而家五百 ...

鹹水生口嘢本來就係海鮮價，魚係咁，珊瑚就更加！

本地好多魚友眼中只有舖頭同＄，一見到定價貴就話舖頭搶錢，但須知其實價格唔係完全由舖頭決定，供求情況往往會有更大o既決定因素。

十年前我啱啱跳海，啲扣係一大嚿石生滿晒咁呢賣，而家就遂粒遂個頭咁計錢！扣算係粗生o既珊瑚，除咗少量罕有品種之外，其實佢o既供應一路都好穩定，價格上升原因主要都係因為多咗人玩，需求上升咗。

相反，有啲珊瑚以前經常都有貨返，但慢慢就絕跡市場，你想再買都搵唔返，我相信唔係無人要無人入貨，而係嗰品種可能被「濫撈」而瀕臨絕種，或者被當地政府禁止出口。呢個就係供應影響來貨。同一批貨同一品種，貨量多定價就會平啲，相反如果返得一件o既話因為唔憂賣，舖頭就會標高啲價。如果你話舖頭咁樣係謀取暴利，咁一大批貨賣剩o既貨尾割價清貨又點計？

小魚毛

loin20409 發表於 2020-4-3 10:20
謝謝師兄用心的回答, 但東海去不了
我指的價格升得多, 原因係4年前與現在, 由百幾升到而家五百 ...

近年比較少玩LPS，唔敢亂分析你講o既豬腰市價，如果你比較過貨源、size、品種之後定出咁o既評論，大概都唔錯得去邊。

不過以自己觀察， 咁多年呢，魚同珊瑚價雖然都係升多過跌，但就算以自己所知呢十年間，總體呢講都無話相差四五倍咁多，一至兩倍就好普遍，咁其實同通脹都差唔多。

無疑，珊瑚啲確係奢侈玩意，但貴在器材投資，開好缸之後，活體價格其實平過FOT好多，傷亡都比FOT少，平有平玩絕對唔難，唔買四寸搵一兩寸買，舖頭貴就幫ching收，唔好心急要即刻打爆個缸，慢慢咁玩o既話一定有排你撐落去。

小魚毛

看來我的回覆令你產生不少誤解了⋯⋯
如果真的5年左右加幾倍[2~3倍], 10年後還能有多少新手加入呢?
⋯⋯但我不想日後海水變成[有錢人]的玩意, 只是想表達一下而已, 如果你不是[有錢人]的一方, 會明白吧?


其實可能係樓主誤會咗我意思至真。人老咗，口水花都多咗，好容易噴錯隔籬；樓主或者其他魚友請勿對號入坐。

我所講o既只係自己眼見本地魚界獨有o既現像：視貴價魚舖為十惡不赦、人人得而誅之。台灣以至內地論壇都無咁o既風氣，當然佢地都會格價，但唔會仇視個別o既店舖。我唔知呢類魚友背後o既動機係咩：抱打不平？發動網上群眾壓力迫使魚舖調整價格？定抑或根本係其他魚舖o既打手抺黑同行⋯⋯

講真，香港魚街馳名中外數十年，但係點解到而家本地o既水族市場都係一池死水咁？魚舖呃呃氹氹、膛得就膛o既做生意手法當然難辭其咎；但魚友唔理好醜，一味要平o既消費習慣亦都有推波助瀾，否則都唔會有「集中營」呢啲咁o既「魚間地獄」出現。

業界養魚養珊瑚o既技術其實單單呢十年八年間己經提升不少，唔單止成本下調，飼養難度亦都大大減少，但點解只係香港呢到o既水族市場收縮倒退？我唔相信呢個係價錢問題－－魚舖只係識收錢，並且深信魚友交多啲學費，佢地至可以有多啲生意⋯⋯魚友積累太多失敗經驗，於是個個都話得鹹水魚好難養，養珊瑚就更加mission impossible⋯⋯

我當然唔會土豪咁叫人「無錢就咪玩」，但玩珊瑚的確係燒錢玩意－－有錢唔係萬能（唔會齋洗錢就咩都可以養到），但無錢就萬萬不能（淨係個過濾系統都要求高過FOT好多、水冷、燈俱又話唔少得⋯⋯）；所以要慳錢就一定要精打細算，而精打細算唔一定單單指格價，更多更重要應該包括你能夠對所有硬件同生物有關資訊o既準確掌握（嗰件器材啱唔啱你個缸用？嗰件生物你個缸養唔養到？），呢方面除咗自己做功課之外，一間認真服務o既舖頭就可以幫到魚友洗少好多冤枉錢走少好多冤枉路，而服務態度呢家嘢，通常都好難跟平價同步出現⋯⋯

你虛心向人請教，我遇過唔止一間o既老闆會好認真咁同你討論分析、拆解問題，甚至介紹你去邊度邊樹（唔係幫趁佢！）買啲咩嘢；但我見過更多老闆同sales，三句唔埋兩句就叫你幫佢買咩買咩⋯⋯所以我唔係反對魚友去格價，相反呢個係必須o既基本動作，但要知o既就係：最平嗰件貨未必啱你玩，最低價嗰間舖未必畀到適合你o既服務。當中o既差別，一定只有你自己去睇過問過至會知道。

小魚毛

養海水是開心事, 有人能發明減少換水到極限又能養好的就更爽了.

其實一整缸過濾系統o既設定目標，就係幫魚友減少換水o既次數同水量。

所以可以話，我地己經有咁o既技術，但問題係：人都係貪心o既，無人會滿足於一大個缸養幾條魚毛幾件珊瑚，否則o既話，莫講話唔換水，化氮都可以慳翻！又或者可以調翻轉講，如果你肯日日換水咁去服待個缸，可能會咩過濾都可以慳翻！！

小魚毛

loin20409 發表於 2020-4-3 13:17
如上文所說[6吋以上的波羅釘養了3年], 穩定後我都一陣子沒買了, 因為買了數千元平價貨, 也死了千多元平價 ...

其實以往仲有幾個本地海水論壇o既日子，要搵全港魚店o既名單唔難，不過時移世易，惟有自己摷多啲望多啲。

漏咗一間，雖然唔係樓上舖，但算係喺魚街附近o既老店：亞瑪遜，雖然位置吊腳（花園街界限街交界，近警察體育會），但器材同生口嘢都唔少，特別係葵同皮，價錢亦都合理，老闆亦都肯同你交流。行開魚街o既話，值得過去走一轉。