奶嘴海葵問題

小魚毛

點樣「跌出」呢？你應該影張相放上呢問，否則大家都只可以估估o下咁答你。

我估係隻葵食咗某啲嘢消化唔到，所以「嘔」翻出呢，你見到佢中間個窿就係海葵口器，出入都係靠佢。嘔出呢o既嘢都會帶啲黏液連住佢口器，唔難分辨。

小魚毛

落缸幾耐？有無水冷？有無餵過佢食咩？

海葵無咩排涉物，惟一係食剩消化唔到o既嘢就會嘔翻出呢。

第四張相睇唔到圈住o既係咩，不過把口擘到咁大，都代表隻葵好唔妥。

第三張相白色一絲絲o既似係爛肉，情況唔樂觀。如果聞到有臭味，就送佢返大海，留喺缸度只會整壞缸水。

退共生藻係會喺把口度吐出啡色絲狀液體，你隻海葵咁淡色，其實共生藻己經吐得七七八八，吐無可吐。

小魚毛

有相、有線索，我可以答你隻葵「跌出」呢o既，就係你兩日前餵佢食o既蝦肉，佢消化唔到而嘔翻出呢。

佢而家o既狀態未必同你餵佢食蝦有關，兩星期時間的確比較短，未必足以搞到佢得翻半條命，你個缸水溫無問題，但你仍可以檢視o下水質（NH4、NO3 、PO4⋯⋯）、光照、水流，呢啲都係養海葵要求o既條件。

正常海葵體內有足夠共生藻o既話，佢啲觸手會有明顯o既顏色，奶咀o既觸鬚更加會有花紋；而你隻葵啲觸手近乎透明，所以我話佢啲共生藻已經吐得七七八八，如果兩星期前你買嗰陣已經係咁o既色水，咁問題就係你喺舖頭揀咗隻唔健康o既海葵。

你而家可以做o既其實唔多。唔好期望餵食可以起死回生，海葵同珊瑚一樣，餵食唔係飼養o既必須條件，何況而家佢得翻半條命，你餵佢食咩都係嘥料。控制好水質、照明，將佢移近造流，確保有足夠水流可以減輕感染，然後就祈禱裝香，希望佢呢個星期可以大步檻過。

小魚毛

vickie 發表於 2022-6-4 16:13
現在是這樣的

雖然好淡色，不過仲會吸水漲翻，即係話仲有啲態，可以繼續觀察。

留意佢把口，健康o既海葵口器應該係緊閉，擘大把口就唔係好事。

隻葵已經上咗石，點解又返落去個兜度？係咪走過位，去搵過造流泵？

小魚毛

咁就清楚喇。

你隻葵主要係兩個問題：
1)匿入石罅太耐無光照，共生藻吸唔到光做唔到嘢，所以隻葵咁淡色。咁唔同退共生藻，水質差：水溫、酸鹼度、營養鹽水平欠佳等，隻葵就會退共生藻自保。如果無光，共生藻製造唔到食物，隻葵一樣會淡色，但共生藻仍然存在。
2)拉扯腳部受傷。你由石罅拉佢出嚟呢個決定無錯。奶咀匿入石罅原因未明（事實係奶咀點揀落腳點到而家都無人知！)，但唔理佢猶得佢喺石罅入邊一樣死路一條。問題係你將佢同嚿石分開嗰陣比較暴力，拉傷咗佢。下次可以試o下拎起嚿石，用指甲由腳邊慢慢逐少逐少咁刮起佢，咁受傷機會會少啲。

可以點做？其實唔多：
1)留喺兜到，畀佢足夠照明，等啲共生藻再活躍翻，隻葵有翻顏色，至開始餵食，普通細細粒嗰啲魚糧就可以，太多、太好o既伙食佢反而食唔到。佢有態o既話，啲觸鬚就會黏住啲魚糧自行捕食。
2)如果傷口唔大，一般o既拉扯損傷係可以自行復原，但如果係入過造流，就多數執得翻都嘥藥費。保持足夠水流，防止傷口感染，咁係有機會好得翻。

小魚毛

隻葵好翻之後再落缸，先要喺造流加層網套，保護隻葵吸咗埋去都唔會變肉醬。第二就係再執過石景，盡量避免有窿罅可以畀隻葵攝入去。奶咀其實唔容易服侍，自問自已都未算成功養到過佢，所以都唔鼓勵新手試，希望有其他ching可以有成功經驗分享。