討論魚街有邊間D魚精神D...

小魚毛

Kekw3310 發表於 2023-3-10 18:40
講真唔會睇鋪揀魚…玩得癲真係會跑哂全港都有

Ching講得好！
揀舖頭根本無意思！因為間間舖頭都係同一水貨，你只要留意o下舖頭返貨區（商店通告∼生物）啲 Post，好多時都係一有魚返，就幾間一齊出Post，仲要係同一產地，所以根本就係同一批貨，只係由唔同魚舖或者拆家分貨。

毒魚係好舊式&短視o既捕魚法，其實好多地方都已經禁止，但因為低成本，個別落後地區仍會有漁民咁樣搵食；就係來貨平，自然會有舖頭入貨，因為一定會有魚友貪平幫襯，有求自然就會有供，所以毒魚o既持續出現，魚友都應該負上部分責任。

個人觀察，呢啲魚通常有兩個共通點：1)超平；2)舖頭通常都唔會出post，公佈貨源產地等資料。

我唔係鼓吹貴魚就係好，亦都未至癲到跑晒全港咁搵魚；不過貨比三家，比價錢、檢視貨品質素（魚態），應該只不過係最最最基本o既消費態度。買一次魚，行完一條魚街先至畀錢，一定穩陣過你瞌埋眼，咩都唔理咁就走入一間舖頭去揀魚。

信舖頭不如信自己經驗眼光，連揀魚技能都解唔到鎖，不如上返岸算。