有信譽魚鋪一問

小魚毛

信魚舖不如信自已！
我覺得老一輩魚店o既做生意手法，都係當啲客係水魚咁劏。可能因為以前競爭唔大，佢地有穩定o既客源，資訊又唔流通，識最多o野o既就係佢地呢班內行人。所以佢地寧願等啲客死多啲魚，交多啲學費，咁佢地至有生意......


我記得自已決定跳海嗰陣，有一間魚舖個老闆咁同我講：「你幫襯我開缸，我包你兩日就可以加魚。不過你一定要幫我買魚，唔好去其他魚舖。我有個客唔聽我講，結果養親都死......」我慶幸自已都有做過功課至行落魚街，聽老闆吹完之後，禮貎咁應左佢一聲，之後無再踏足佢間舖頭一步，而無耐之後，佢間舖亦都喺魚街上消失左。


雖然話「今時今日咁o既服務態度......」，不過每間魚舖都有佢自已o既生存之道，試過有新店就算你唔買嘢都畀包嘢你飲，可惜都玩得唔耐！海X主要係做批發，拆貨落魚街，同埋啲幫襯開o既熟客，已經夠佢做，佢門市價平過魚街，咪即係同自已啲客爭生意。不過佢返魚快又多，而且有時有啲特別魚種又的確係「只此一家」，所以行過望望咪當開o下眼界，唔需要當人大奸大惡。

自已做好功課，唔好係咩魚都未知就畀錢，就已經慳好多學費。驚畀人呃而唔落魚舖，其實只係剝削左自已選擇o既機會。